Siglir tar il cuntegn

Header

audio
Linard Bardill vul purtar curaschi cun ses nov album
Or da Actualitad dals 21.10.2022.
laschar ir. Durada: 2 minutas 55 Secundas.
cuntegn

Linard Bardill En in «#nu#» dal lockdown al look-up

Il chantautur Linard Bardill è enavos. Questa giada cun in album per persunas creschida che porta il num «#nu#».

«#nu#» stat per l'uss – in omagi al maister Eckhart, il teolog e filosof tudestg, ch'ha ditg «nur im Nu' passiert das Leben». Ord quest motiv portia er l'album quest titel, ha declerà Linard Bardill tar sia visita tar RTR.

Ier è gia capità, damaun n'è anc betg capità ed en l'uss capita la vita.
Autur: Linard Bardill Chantautur

Var 200 concerts n’ha el betg pudì realisar pervia da la pandemia da corona – lungurus n'ha il chantautur però betg gì. Igl è stà in temp nua ch'el è stà fitg occupà cun las preparativas per il Forum mundial d'etica ch'è stà quest avust a Puntraschigna. Quai ed il temp da metter sez puspè pli datiers a la natira, han d’ina vart dà sinergias e da l’autra vart inspiraziuns per las novas chanzuns ed il nov album.

Batten da la platta

Avrir la box Serrar la box

Ils 28 d'october preschenta Linard Bardill ses album «#nu#» en la Klibühni a Cuira.

Spezialmain il temp da corona è stà ina gronda inspiraziun per il chantautur da Scharans. En il lockdown han ils carstgauns pers lur libertads ed han stuì viver sin fitg pitschen spazi. En sia chanzun «Bäsäkammere» descriva el ses sentiments davart il lockdown.

Ins avess ina chasa entira a disposiziun ma en il lockdown èn ins vegnids mess en in chantunet.
Autur: Linard Bardill Chantautur

Suenter uschè in grev temp da temas e restricziuns ha Linard Bardill cunzunt vulì dar ina chaussa a ses publicum, numnadamain curaschi. Curaschi da puspè vegnir ensemen e da star en cumpagnia. Ils umans duain festivar, saltar e chantar communablamain. Mo uschia vegn la glieud or da questa crisa.

RTR actualitad 17:00

Artitgels legids il pli savens

Scrollar a sanestra Scrollar a dretga