Quest onn va il Premi grischun da cultura al musicist Clau Scherrer ch'è naschì e creschì si a Trun. En il rom d'ina festa publica en la sala da cultura a Trun ha il minister da cultura, Jon Domenic Parolini surdà il premi a Scherrer. Il premi è dotà cun 30'000 francs.
-
Bild 1 von 6. Jon Domenic Parolini – schef dal Departament d'educaziun, cultura e protecziun da l'ambient – surdat il premi grischun da cultura 2024 al victur Clau Scherrer. Bildquelle: RTR.
-
Bild 2 von 6. Victur ventiraivel: Clau Scherrer tegn in pled ed engrazia per l'onur. Bildquelle: RTR.
-
Bild 3 von 6. Gratulaziuns survegn Clau Scherrer er da Giovanni Netzer. El è fundatur dal festival Origen e s'engascha per la cultura en il Grischun. Bildquelle: RTR.
-
Bild 4 von 6. Franz Sepp Caluori – president dal Cussegl grond – è er preschent per gratular a Clau Scherrer. Bildquelle: RTR.
-
Bild 5 von 6. Er il president communal da Trun ha tegnì in pled. Bildquelle: RTR.
-
Bild 6 von 6. Jon Domenic Parolini,Clau Scherrer e Giovanni Netzer (da san.). Bildquelle: RTR.
Cumenzà sia carriera musicala ha Clau Scherrer sco pianist professiunal a partir dal 1999. Suenter plirs onns da success dumagna Scherrer er da s'etablir sco dirigent renconuschì. Sco manader da l'ensemble vocal Origen e dal cantus firmus Surselva ed sco dirigent da chors da vallada e da chors da giuvenils, haja il musicist grischun influenzà ils ultims onns la musica en il Grischun, scriva la regenza en sia communicaziun. El saja in pianist excellent ed in promotur spiertus da la chanzun rumantscha.
Plinavant surdat la Regenza sis premis da renconuschientscha e tschintg premis da promoziun da mintgamai 20'000 francs. Ils premis vegnan surdads ils 31 da matg 2024 en il rom d'ina festa en la sala da cultura a Trun.
Premis da renconuschientscha 2024
- Angelika Abderhalden-Raba, scienziada da la natira, Zernez, 1965
- Johann Clopath, schurnalist/autur da cudeschs tematics, Trin, 1951
- Yannik Frateur, 1969, e Jessica Mehling, 1975, musicista e musicist, Fidaz
- Piera Gianotti, actura/reschissura/manadra artistica/pedagoga da teater, Bregaglia/Bidogno, 1976
- Bianca Mayer, musicista, Lumbrein, 1979
- Vincenzo Todisco, autur, Razén, 1964
Premis da promoziun 2024
- Leander Albin, artist multipel, Tersnaus, 1992
- Krzysztof Barczynski, fisicher/astronom, Tavau, 1988
- Svenja Gansner, artista e realisatura visuala, Seewis/Basilea, 1998
- Corinne Kälin, sautunza, Grüsch, 2001
- Fabio Pola, musicist, Brusio, 1993