Marella - Gian Bundi – randulin e collectur da las «Parevlas Engiadinaisas»

Las istorgias èn da chattar en il cudesch «Parevlas Engiadinaisas» da Gian Bundi – in cudesch da success, er grazia a las illustraziuns da Giovanni Giacometti.

Legenda: Gian Bundi e Giovanni Giacometti enturn il 1900 MAD

Gian Bundi è il pli impurtant ed enconuschent collectader da paraulas da l’Engiadina. El las ha mess en scrit per rumantsch e tudestg avant bundant 120 onns. Questas paraulas vegnivan pli baud gugent raquintadas en l'Engiadina ed in spezial a Bever da la cusunza Nann’Engel. Grazia a Bundi enconuschain nus questas istorgias enfin oz – istorgias che tradeschan er bler da la vita e dal mintgadi en l'Engiadina dal 19avel tschientaner.

Legenda: Gian Bundi e sia dunna Bernhardine Rollier MAD

Ils 26 d’october pudess Gian Bundi (1872-1936) festivar ses 150avel anniversari. La Marella sa metta ensemen cun il romanist Peider Andri Parli e cun l’etnologa Ursula Brunold-Bigler als fastizs da Gian Bundi e sias paraulas.

Legenda: Las illustraziuns originalas da Giovanni Giacomietti èn arsas en occasiun d'in fieu en la chasa editura a Turitg ch'aveva edì enturn il 1901 l'emprima ediziun da las «Parevlas Engiadinaisas». Mantegnidas èn mo paucas skizzas che Giacometti aveva fatg per mauns da Gian Bundi – quellas èn oz en possess privat. MAD