Siglir tar il cuntegn

Header

video
L'artist internaziunal Wolfgang Laib fa art cun ris e pollens
Or da Telesguard dals 18.03.2022.
abspielen. Laufzeit 4 minutas 2 Sekunden.
cuntegn

Museum d'art dal Grischun Graun per graun, munt per munt – Art cun ris

Wolfgang Laib, in artist da renum internaziunal, expona passa 20'000 munts da ris en il Museum d'art dal Grischun a Cuira. L'artist ch'è influenzà da la cultura asiatica ha installà durant in'emna ils munts da ris ensemen cun gidanters.

«Crossing the river», pia traversar il flum, è il titel da la nova exposiziun (19-03-2022 fin 31-07-2022) en il Museum d'art dal Grischun. Ensemen cun gidanters ha l'artist tudestg Wolfgang Laib rasà ora passa 20'000 mantuns da ris sin il palantschieu. Trais ulteriurs elements cumpletteschan l'exposiziun: In poesia en segns chinais, ina pitschna muntogna da pollens ed ina chaschina d'eucaristia carolingica dal Museum dal stgazi da la catedrala da Cuira.

Tgi è Wolfgang Laib?

Avrir la box Serrar la box

L'artist Wolfgang Laib è naschì il 1950 a Metzingen en Germania. Adina puspè viagian el e ses geniturs en l'Asia u er en ils Stadis Unids da l'America. Tras quai sviluppescha el in ferm connex cun la cultura asiatica. Dal 1968 – 1974 studegia el medischina, sias spetgas a la medischina na vegnan dentant betg ademplidas. El visita silsuenter prelecziuns da filosofia, psicologia, archeologia, istorgia d'art e filosofia orientala.

A partir dal 1971 studegia el supplementar al studi da medischina indologia, el emprenda sanskrit, hindi e tamil. Sco medi n'ha el mai pratitgà. Sco artist giauda el in grond num cunzunt en ils Stadis Unids da l'America e l'Asia.

La preschentaziun da millis muntognas da ris furman ina relaziun cun las caracteristicas architectonicas dal local. Sco nutriment il pli impurtant simbolisescha il ris la vitalitad ed è essenzial per la vita terrestra. Per l'artist ha l'installaziun temporara ina dimensiun spirituala ed ans maina directamain a las funtaunas da sia poetica. Materials natirals sco pollens, latg, ris u tschaira da mel suttastritgan sia lavur.

audio
L'exposiziun da Wolfgang Laib
aus Actualitad vom 18.03.2022.
abspielen. Laufzeit 3 minutas 40 Sekunden.

Oriundamain ha Laib studegià medischina. Dentant n'ha la filosofia da la medischina da scola betg cuntentà l'um. Tras quai ha el studegià vinavant indologia ed è daventà silsuenter artist. Malgrad questa midada ha la medischina ina gronda muntada per el. Tenor el vivia la medischina vinavant tras ses art.

Senza l'experientscha da la medischina n'avess jau betg pudì crear quest'ovra.
Autur: Wolfgang Laib artist

L'artist tutga tar ils pli impurtants artists dal temp dad oz. Exposiziuns ha el gia gì a New York, Tokyo e Paris. El ha pudì represchentar la Germania a la Biennale 1982 a Venezia ed ha fatg part cun sias ovras a la documenta 7 il 1982 e documenta 8 il 1987. Il 2015 ha el gudagnà il Praemium imperiale per ina sculptura a Tokyo.

RTR Telesguard 17:40

Artitgels legids il pli savens

Scrollar a sanestra Scrollar a dretga