Il grond artist grischun Hansruedi Giger da Cuira è daventà renumà sin l'entir mund cun sia figura per il film «Alien». Per quell'ovra ha el gudagnà in Oscar l’onn 1980. Sias installaziuns scurrilas plain fantasia fan il medem mument smirvegliar e temair. Il museum d'art Grischun vul uss midar quest maletg da l'artist cun sia nova exposiziun tar ils onns d'uffanza e da giuventetgna da Giger: «Die Churer Jahre».
Ins ha adina il maletg dad el sco magier che gira enturn en il mantel nair da tgirom.
Davart l'artist datti bleras istorgias, legendas e mitus: el duai esser stà fascinà da la mumia en il museum retic u avair fatg ina spassegiada cun ina chavazza da morts. «Gigé», sco quai ch'el vegniva er numnà d'amis, n'è dentant betg mo quella figura. L'exposiziun en il museum d'art mussa fotografias en nair ed alv da Giger en ses onns d'uffanza e da giuventetgna. Ins po observar il pitschen Hansruedi co ch'el mangia ensemen cun sia famiglia u co ch'el passenta temp sin l'acla a Foppa sur Flem. Il giuven Giger ves'ins lura a sunar saxofon u clavazin, ses collegas sautan rock'n'roll. Ed i dat era fotografias da la stanza naira legendara en la quala i ha schizunt dà partis da jazz.
L'idea per l'exposiziun è vegnida a Stephan Kunz, cussegliader artistic dal museum d'art, cura ch'el è vegnì a savair da la scuverta da Charly Bieler: Fotografias da l’uffanza e giuventetgna da Giger e sia famiglia. Il schurnalist è maridà cun l'ex dunna da HR Giger, Mia Bonzanigo. Sin l’acla a Foppa che Giger aveva surlaschà ad ella han els chattà las fotografias.
L'exposiziun «Die Churer Jahre» consista per part da quellas fotografias, ma er anc dad autras or dal relasch da Giger.
Sin mintga fotografia sa zuppan istorgias e tut ensemen dat in maletg da Hansruedi Giger sco ins n’enconuscha betg.
L'exposiziun pon ins visitar dals 14 da settember fin ils 24 da november en il labor dal museum d’art Grischun a Cuira.
