La nova exposiziun dal Museum retic mussa tranter auter la Brev da federaziun da l'onn 1524 ed anc blers auters stgazis grischuns en connex cun las festivitads da 500 onns Stadi liber da las Trais Lias. Visitadras e visitaders duain scuvrir il Grischun cun tut ils senns en l'exposiziun cun il num «allià e collià – 500 onns Stadi liber da las Trais Lias». L'exposiziun ha duas parts: Ina sa deditgescha al Stadi liber, l'autra ha il focus sin il Grischun sco patria.
-
Bild 1 von 7Legenda: Museum retic -
Bild 2 von 7Legenda: Museum retic
-
Bild 3 von 7Legenda: Museum retic
-
Bild 4 von 7Legenda: Museum retic
-
Bild 5 von 7Legenda: Museum retic
-
Bild 6 von 7Legenda: Museum retic
-
Bild 7 von 7Legenda: RTR
Brev da federaziun en il center
La Brev da federaziun è il document cun il qual las Trais lias han sigillà il 1524 la fundaziun dal Stadi liber. Quest document stat en il center da l'exposiziun. Il manuscrit da quella è punct da partenza. Vitiers vegnan auters documents che mussan l'istorgia dal Stadi liber. Sper il sguard en l'istorgia veglia l'exposiziun en emprima lingia far la colliaziun al temp dad oz. Temas sco schliar conflicts u partizipaziun sajan stads centrals avant 500 onns, èn dentant er oz da gronda impurtanza per la convivenza.
Ils dus puncts principals da l'exposiziun èn per nus la colliaziun tranter il passà ed oz e la participaziun da las visitadras e dals visitaders.
Il Grischun sco patria cun objects da la populaziun
En la segunda part da l'exposiziun stattan objects en il center che duain mussar il Grischun sco spazi da viver. Ils var 160 objects ha la populaziun contribuì. Per mauns da quels pon ins constattar che il sentiment da patria ha bleras fassettas. Quels stgazis èn vegnids rimnads durant l'onn a chaschun da l'exposiziun ambulanta «Stgazis grischuns sin viadi» e vegnan uss mussads tuts ensemen. In pèr da quests stgazis èn schizunt exponids en curtin dal museum en il container cotschen che ha fatg il viadi tras l'entir chantun.