Per la publicaziun ha l'autur fatg intervistas cun 35 persunas da Trin, Glion e da Trun. Plinavant, sco sort gruppa da controlla, ha el fatg intervistas cun glieud da Scuol. L'autur ha per exempel dumandà, co ch'els han emprendì tudestg en scrit e tge relaziun ch'els han cun il tudestg svizzer. Pli tard han els transcrit ils texts e congualà quels.
Ina da las enconuschientschas da las bunamain 400 paginas: Rumantschas e Rumantschs hajan ina cumpetenza da tudestg fitg auta. Persunas pli giuvnas discurrian dentant meglier tudestg, cunquai ch'els dovran la lingua er dapli en il mintgadi. Ina sort «Oberländertütsch» na dettia dentant propi betg, er sch'ins bada ch'il tudestg n'è betg lur lingua materna.
Continuaziun da «Alemannisch im Churer Rheintal»
Dad Oscar Eckhardt n'èsi betg l'emprim cudesch davart il «Alemannisch». Gia avant intgins onns è l'autur, ensemen cun in expert per il dialect da Cuira, s’occupà cun ils dialects en la Vallada dal Rain.
