«Plaids detgavunda» – uschia ha num il nov cudesch da Maria Cadruvi, l’autura ed anteriura schurnalista. I sajan texts sparpagliads – poesias, artitgels da gasettas, texts rumantschs e tudestgs. A la dunna da Ruschein plaschan ils texts curts, per part era en furma da diaris. In da ses texts preferids en ses agen cudesch è in artitgel ch’era vegnì publitgà en la revista sursilvana «Ischi». Quest text sur dal pro e contra dal rumantsch grischun saja restà en memoria ad ella.
Jau hai plaschair da quest text, perquai che jau hai l’impressiun che jau sun critica e frecha – e tuttina conscienziusa.
Per Maria Cadruvi è quai in project da cor. Ella di ch’il cudesch è sco in album da fotografias, simplamain cun pleds. I duai esser in cudesch per confamigliars, amis ed amias. Quai è in motiv, pertge ch’il cudesch na vegn betg en la vendita. En pli saja quai blera lavur administrativa da far in cudesch per la vendita, ed ins stoppia er avair plazza per cudeschs che na vegnan betg vendids.
Nus faschain part ad ina generaziun che ha uschè blers cudeschs – cudeschs detg avunda.
Uschia vuleva ella dar la pussaivladad a la glieud da leger il cudesch senza stuair cumprar el. Perquai ha ella fatg in «cudesch migrant». Pia intginas ediziuns stampadas che circuleschan tranter persunas. L’idea è che las persunas legian il cudesch – e suenter var trais emnas dattan ellas vinavant el. In’autra opziun è da chargiar giu il cudesch cun in code da QR ch’è sin la pagina da la chasa editura Octopus. Il 41avel cudesch da la chasa editura Octopus dad Andreas Joos, il consort da Maria Cadruvi. Probablamain l’ultim cudesch che cumpara là. La chasa editura aveva intgins cudeschs ch'han gì success – tranter auter «Giacumbert Nau», «Gedanken an John Coltrane» u las «crestomazias rumantschas».
L'entir cudesch «Plaids detgavunda» po vegnir chargià giu gratuitamain sin la pagina d'internet da la chasa editura Octopus.