(Sursilvan) Per absolventas ed absolvents dalla Scol’auta da pedagogia va il studi suenter treis onns a fin quels dis. Miez uost entscheiva pia ina u l’autra persuna d’instrucziun per l’emprema gada ad instruir.
Era jeu s’audel tier la gruppa d’absolvents/as. Lantschau hai jeu quei davos semester cull’energia dad ina genetscha che fa la primavera ses emprems spruns silla prada. L’euforia ch’il studi va da rendiu era gronda. Uss, suenter tut quellas lavurs finalas, presentaziuns, examens e practicums sun jeu plats. Sc’in ballon senz’aria. Vits e staunchels.
Tonpli sun jeu selegraus da festivar il davos examen cun ina buna tscheina en cumpignia. Ina gruppa dad absolventas ed absolvents ei a moda spontana numnadamein sedecidida da serender suenter igl examen silla terrassa dad in’ustria e da far in viva. Igl era ina gruppa heterogena cun studentas e students da tuttas regiuns. Ed ina suenter l’autra ha raquintau nua che la via futura vegn a menar els. Ils ins en marcaus ed auters en vischnauncas. Ils ins ella Bassa ils auters ella regiun.
Mintgin va sia via.
Ina studenta ha raquintau ch’ella vegni ad instruir ella Bassa ina 6avla classa. La scola hagi dumandau ella, sch’ella fussi era pronta da surprender ina lecziun da religiun ad jamna. Per ella negin problem.
In pèr dis pli tard hagi la suprastonza dalla pleiv denton telefonau ad ella ed informau che la pleiv hagi da reponderar, sche quei seigi insumma pusseivel. La suprastonza hagi viu ch’ella seigi da confessiun catolica ed ei setracti gie cheu dad ina pleiv reformada.