En clinica scuntra Andri la psicologa e feminista Margarita Felix. A l'entschatta s'oppona el cunter las uras da terapia. En dunna Margarita chatta el dentant in visavi attent, ch'è capabla da chanalisar ed ordinar tut las istorgias fantasticas e sfranadas che giran tras ses chau. Avant ch'el chatta da nov sia via sco autur, sto el però sa confruntar cun ses nufs: qua fiss la ferida en connex cun la publicaziun da ses emprim roman sco era la relaziun cun sia amia Mirabai. Ella ha success en sia lavur sco advocata e la dominanza finanziala da sia amia ruja vid la conscienza da sasez d'Andri. El vegn sfurzà da redefinir da nov sia rolla sco um. Quest viadi daventa ina sfida betg mo per el mabain era per sia terapeuta.
Suenter esser vegnì internà cunter sia veglia en psichiatria scuntra Andri en sia emprima sesida da terapia Margarita Felix. En ses chau sa maschaidan siemis, experientschas e fantasias ad in sammelsuri abstrus. Era sia terapeuta para da far part da questas conspiraziuns.
Era sche Andri è pli che sceptic entschaiva el cun la terapia. Davos ses siemis ed istorgias confusas sa mussan plaun a plaun ils dramas da sia vita: il conflict en connex cun ses roman e la relaziun vi e pli problematica cun sia amia.
Suenter pliras emnas en clinica è Andri cumplettamain demoralisà e pers. El sa vesa sco um a la veglia ed or moda – sco cas problematic e toxic. En in acziun da desperaziun sa separa el perquai da sia amia Mirabai e vul chalar cun il scriver.
Andri è s'endisà a la vita en la clinica e fa emprims pass envers ina reconvalescenza. Cunter tschertas furmas da terapia, sco la gruppa per umens, sa dosta el dentant. Da moda nunspetgada scuvra el da nov ses talent per il scriver.
Andri ha decis da terminar la terapia e quai era sche dunna Margarita n'è insumma betg d'accord. Il success da sia nova columna «La lunga notg da l’emancipaziun» ha restabilì la fidanza en sai, uschia ch'el ristga il sigl enavos en la vita.
