Il reschissur è mort cun 91 onns. El lascha enavos ina grond'ovra da films renumads. Ils pli enconuschents èn «À bout de souffle» (1960), «Une femme mariée» (1964) e «Le Mépris» (1963). Cun «À bout de souffle» è el vegnì enconuschent quasi sur notg. Avant ha el er fatg in film davart il mir da fermada «Grand Dixence», «Opération Béton» durant ch'el ha lavurà sin il plazzal dal mir.
Ina gronda influenza sin la lingua dal film
Enstagl da filmar en il studio sco usità, ha Godard filmà ils cafés e las vias cun ina camera da maun en «À bout de souffle». Ses tagls da film n'avevan ni ritmus ni regla. I vegn attestà ad el ch'el haja revoluziunà la lingua dal film. Cun betg ademplir las spetgas dals aspectaturs haja el survegnì sia libertad artistica, ha el sez ditg.
Il stil da film da la «Nouvelle Vague» è lura vegnì memia convenziunal per el suenter in tschert temp. Ses stil è vegnì pli fragmentà, ed el ha chattà totalmain novas furmas da raquintar.
Godard ha fatg la scola a Nyon en il chantun da Vad. Suenter la separaziun da ses geniturs è el ì a Paris. Là ha el cumenzà sia lavur artistica cun fundar la gasetta critica da kino «Cahiers du Cinéma». A partir dal 1980 ha el vivì sper il Lac Léman.