E daco stuain tschantschar da las armas atomaras – cleramain ina discussiun ch'ins na fa betg gugent. Almain betg sch'ins n'è betg in tipic Bond villain che vul charsinar sper il giat alv era ina giada ina bumba atomara sin schanuglia. Nus tschantschain d'armas atomaras perquai che la Russia ha mess sias forzas atomaras en prontadad d'alarm augmentada. Quai munta, che las persunas che pon per propi metter ad ir las armas atomaras èn 24 uras a di prontas per gist quai. Ins manegia che la Russia haja 4 stgalims d'alarm cumenzond tar 1 (tut normal), lura 2 (prontadad augmentada), 3 (tut preparà per sajettar), 4 (dar en ils codes e sajettar).
En ils Stadis Unids vegn tschantschà dals stgalims da DEFCON (DEFense readiness CONdition). Là è però 5 il stgalim il pli bass ed 1 il stgalim cun la prontadad la pli auta. Stgalim DEFCON 1 munta: Prontadad per u gia cumenzà la guerra atomara.
Bleras armas. Fitg bleras.
I dat er anteriuras pussanzas atomaras. L'Africa dal Sid aveva ils onns 1980 intginas bumbas atomaras. Quellas armas eran resultadas ord in project che vuleva atgnamain duvrar bumbas atomaras en las minas per chavar per minerals ed auter. Plans en quella direcziun deva quai ils onns 1960 e 1970 blers. Dapi il 1996 cun il Comprehensive Nuclear-Test-Ban Treaty che scumonda tuttas explosiuns nuclearas è quai però finì.
MAD – La pasch dals disturbads
M A D stat per «Mutual Assured Desctruction», la destrucziun vicendaivla garantida. Uschè spert ch'ina pussanza atomara sajetta armas atomaras sin ina autra (u sin in partenari da defensiun da lezza) datti la resposta da l'autra pussanza atomara. E quella è medemamain en furma d'armas atomaras. Ins garantescha uschia vicendaivlamain l'eliminaziun. Ma, destruidas vegnan betg mo las pussanzas involvidas mabain era la civilisaziun sco nus l'enconuschain. Il resultat d'ina guerra atomara fiss in enviern nuclear che faschess il surviver da la carstgaunadad sin terra fitg difficil. Quai na vul da principi nagin e pervia da quai dian ins, che MAD haja tegnì durant decennis la pasch tranter las pussanzas atomaras.
Mo grazia ad in russ – nagina guerra atomara
Il cas il pli prominent che la carstgaunadad ha purtà la civilisaziun a l'ur da sia fin è la crisa da Cuba. Il 1962 ha l'Uniun Sovietica posiziunà armas atomaras sin l'insla da Cuba, sper ils Stadis Unids. Quai sco reacziun sin las armas atomaras americanas en Tirchia. Igl è vegnì ad ina confruntaziun sin la mar enturn Cuba. Sin in sutmarin è vegnì decidì da sajettar ina racheta atomara. Per quai duvravi dentant il «Gea» da 3 persunas. Ina da quellas ha però ditg «Na». Per il 2002 èsi vegnì enconuschent, che Vasilij Archipov, ha salvà il mund d'ina catastrofa.
Links per dapli infurmaziuns:
https://fas.org/issues/nuclear-weapons/status-world-nuclear-forces/
https://de.wikipedia.org/wiki/Wassili_Alexandrowitsch_Archipow
