Siglir tar il cuntegn

Header

Navigaziun

cuntegn

RTR va direct en il cor «Jau hai gugent tai»

Durant in’emna va RTR direct en il cor, cun in program deditgà a l’amur.

Nua entschaiver, cun quest’amur? Tar l’emprim’egliada? Tar il mument cura ch’i fa «bum». U fissi da discurrer tar RTR da las grondas amurs, quellas ch’han fatg sballunar tuttas barrieras? U vulain nus plitost discutar da las crisas e da la statistica da divorzis. Damai: Nua entschaiver?

Vossas istorgias d’amur

RTR cumenza durant si'emna deditgada a «L'AMUR» exact là, nua che tut entschaiva – tar las atgnas experientschas, tar las atgnas istorgias d’amur. Quellas cuntegnan gea schon tut: splerins en il venter, mauns che suan, il battacor, l’emprima saira, crisas, larmas, mal d’amur... I dat bler da raquintar. RTR mussa ina dunsaina d'istorgias d’amur, istorgias da singles e da pèrins che raquintan avertamain da lur relaziuns.

E gea, er voss’istorgia d’amur ans interessescha ferm. Raquintai a nus da voss’amur, ubain per telefon mintgadi tranter las 08.00 e las 11.00 ubain per e-mail (amur@rtr.ch, il link avra en ina nova fanestra).

«Tü nu dessast maridar»

Las Rumantschas ed ils Rumantschs èn gea apparentamain campiuns dal chant. En il repertori da las chanzuns popularas sa zuppan bleras chanzuns d’amur: «Buna sera biala», «Il randulin» , «Silip e la furmia» e bleras autras. Chanzuns che fan surrir e mintgatant era cridar. RTR vegn a preschentar 6 da quellas chanzuns en in vestgì tuttafatg nov. L’illustratura Pia Valär ha numnadamain fatg si’atgna interpretaziun dal «randulin» e raquinta sia supposiziun, pertge che quel di a la giuvna: «Tü nu dessast maridar!» L’entira seria da chanzuns d’amur illustradas èn da chattar sin www.rtr.ch.

AMUR - LA SAIRA

E sco tar l’amur èsi era tar il program dad RTR: Dus che s’han ferm gugent, mussan quai in bel di a tut la parentella ed als amis cun ina festa, cun las nozzas. L’emna d’amur tar RTR ha era ses punct culminant cun ina festetta, en furma dad ina sairada da «late night» deditgada a l’amur.

L’emissiun cun giasts, musica ed in u l’auter surrir mussa RTR la saira dals 23 d matg 2019 sin www.rtr.ch. Da la partida vegnan ad esser l'autura Gianna Olinda Cadonau, la caricaturista Marina Lutz ed il cabarettist Flurin Caviezel. L'emissiun che vegn moderada da Livio Chistell, vegn enritgida musicalmain dal giuven duo Hannes Barfuss e Marcus Petendi.

Il program d’amur sin tut ils chanals dad RTR è dad udir, vesair e da leger tranter ils 19 e 26 da matg 2019 sin tut ils chanals da www.rtr.ch.