Per nossa seria d'architectura han trais possessuras e possessurs da chasas en il Grischun avert las portas da lur perlas architectonicas. Ensemen cun l'architecta ed experta Anita Simeon visita il moderatur Livio Chistell ils bajetgs per guardar tge che sa zuppa davos la fatschada e co vegls mirs pon daventar in nov dachasa.
Anita Simeon Lutz (52) è creschida si a Lantsch e viva oz a Neerach en il chantun Turitg. La Rumantscha è architecta ETH ed anteriura schef-redactura dal magazin per architectura, design e cultura d’abitar «Das ideale Heim».
Stalla a Favugn
Il clavà dal 1847 è vegnì bajegià enturn il 2020. La devisa da la possessura è stada da mantegnair tut quai ch'è pussaivel. Uschia èn il vegl mir da crap e la structura dal tetg da la stalla stads ils elements fundamentals en la planisaziun dal project da l'architect da la Val Müstair Linard Andri. La chasa cun sia fatschada caracteristica da lain stgir è vegnida premiada cun differents premis d'architectura ils ultims onns.
Clavà a Lumbrein
Il clavà a Lumbrein tutga tar in da plirs ch'èn vegnids transfurmads ils ultims onns dal scrinari lumnezian Claudio Alig ensemen cun l'architect da Haldenstein Michael Hemmi. Tar tut quests objects ha la fatschada oriunda cun laina radunda stuì vegnir mantegnida. Savens è il tetg uschia vegnì remplazzà ed en l'intern è vegnì erigì ina sort boxa da lain. Ils clavads renovads vegnan entant tuts duvrads sco chasas da vacanzas.
Chasa engiadinaisa cun tavlegià ad Ardez
La chasa purila engiadinaisa cun stalla dal 1640 è vegnida transfurmada il 2021. Il project ch'è vegnì realisà dals architects Duri Vital ed Adriana Stuppan han ils possessurs da la bassa laschà custar bun 1,5 milliuns francs. Cunquai ch'i sa tracta dad in bajetg istoric hai l'emprim duvrà in'expertisa per savair tge ch'ha stuì vegnir mantegnì. Ina lavur ch'è vegnida fatga da Mengia Mathis, la cussegliadra da construcziun da pliras vischnancas grischunas.
Da la chasa da purs al chastè?
Tgi che vul bajegiar ubain renovar in bajetg en nossas valladas – dovra adina dapli cletg da chattar in object ed in adina pli grond budget per lura pudair cumprar el. Spazi d'abitar è daventà rar. En la Marella guardain nus sin las raschuns per quai e dumandain: tge fa quai cun noss bajetgs e lur substanza?
Persunas dal fatg èn perina, ch'igl è da principi d’avantatg sche tut las chasas vegnan renovadas e mantegnidas per generaziuns futuras. La dumonda, co quellas renovaziuns duain capitar, quellas dattan però da discutar.
