Siglir tar il cuntegn

Header

video
Suenter dus onns pausa puspè in Sontgilcrest quasi sco usità a Domat
Or da Telesguard dals 16.06.2022.
laschar ir. Durada: 3 minutas 12 Secundas.
cuntegn

Sontgilcrest Domat sut l'ensaina da la festa tradiziunala

Suenter dus onns pausa ha finalmain puspè gì lieu la gronda festa a Domat quasi sco usità. Pervia da la plievgia han ils da Domat però spustà la processiun da Sontgilcrest sin suentermezdi.

Suenter dus onns pausa sfurzada, ubain be ina pitschna festa cun restricziuns da corona, ha la processiun tradiziunala da Sontgilcrest a Domat puspè gì lieu - pervi da la prognosa da plievgia dentant pir il suentermezdi. Quatter altars decorads pumpus, in tarpun da pastg cun ina lunghezza d'in kilometer e mez sco era bancs da fanestras ed entradas da chasas decoradas cun statuas e fluras fan or da quest di insatge spezial. Sco ina da las paucas vischnancas catolicas festivescha Domat Sontgilcrest tenor tradiziun la gievgia suenter la dumengia da la trinitad.

audio
Sontgilcrest Domat: Plaschair da puspè pudair festivar sco usità
ord Actualitad dals 16.06.2022.
laschar ir. Durada: 2 minutas 20 Secundas.

La cumpagnia da mats, la musica da Domat ed ils tamburs da Domat collavuran quest di. En il center stat la regurdientscha vi da l'instituziun dal sacrament d'altar. La festa cumenza gia la saira avant cun la retirada. La gievgia la damaun baud cumenza il di da festa cun il resvegl dal guardian da notg ed ils tamburs.

Sontgilcrest d'avant 125 onns

La festa da Sontgilcrest ha ina lunga tradiziun a Domat. Las emprimas fotografias ch'existan èn da l'onn 1897, pia 125 onns veglias. Quellas aveva fatg in fotograf oriund da la Germania ch'aveva a Cuira in atelier. Sco Theo Haas che posseda las fotografias ha scrit en la gasetta «Ruinaulta», saja da far quint ch'il fotograf era vegnì il di dals 17 da zercladur 1897 cun il tren da Cuira a Domat e transportà uschia l'equipament grev. Questa lingia da tren da la Viafier retica era lura pir in onn veglia.

RTR actualitad 08:00

Artitgels legids il pli savens