Il museum Kirchner a Tavau po schlargiar ses inventari. Cun la privata «collecziun Ulmberg» survegnian ins var 100 ovras d'art modernas e contemporanas d'auta qualitad. Tut ils artists – per exempel Max Beckmann, Lyonel Feininger e Emil Nolde – hajan in connex stretg cun Ernst Ludwig Kirchner e ses moviment expressiunistic, uschia cumpletteschia quella collecziun fitg bain las ovras existentas en il museum, quellas èn per gronda part da Kirchner. En la collecziun sajan tant maletgs sco er intginas sculpturas. Per la directura dal museum in cas da fortuna nunditg:
Quai è insatge che capita be ina giada ad ina directura da museum.
Per preschentar las ovras vul il museum construir in bajetg d'engrondiment, e quai cun ils medems architects da renum internaziunal Gigon e Guyer ch'han gia construì il museum existent da l'onn 1992. L'engrondiment fiss planisà cun dus cubus supplementars gist dasper l'entrada. Uschia pudess il museum engrondir lur surfatscha d'exposiziun per 167 meters quadrat. L'entir spazi d'exposiziun vegniss dublegià cun questa construcziun supplementara. Plinavant datti locals d'occurrenza sco er deposits. I saja er pussibel d'integrar in café en il museum, ina dumonda ch'els hajan survegnì savens da lur visitadras e visitaders, di la direcutra en pli.
Finanziaziun per part anc averta
Ils custs per l'engrondiment van en ils milliuns. Tenor il museum surpiglian la fundaziun Ernst Ludwig Kirchner, sponsurs privats ed il Forum economic mundial WEF en tut var 7 milliuns francs. Ulteriurs 4 milliuns francs sco er ina garantia da chapital ester da la medema autezza vulan ins survegnir da la vischnanca da Tavau. Il parlament vegn a decider ils 12 da settember davart quai – la populaziun sto la fin da november dar ses consentiment. Plinavant vegn rimnà raps via fundraising.
Or da l'archiv
L'onn 1992 ha il museum Kirchner a Tavau avert sias portas. Il Telesguard aveva rapportà.
