Suenter dus onns da pandemia saja puspè uras che la populaziun chattia en il teater in lieu per star da cuminanza, di il directur dal teater Roman Weishaupt. Ed agiunta: «Nus avain laschà encrescher per il public ed avain perquai er cun sviluppar il program mess in accent sin il teater sco lieu da s'entupar.»
Nus avain laschà encrescher per il public ed avain perquai er cun sviluppar il program mess in accent sin il teater sco lieu da s'entupar.
Tuttina vegnan er ils tocs digitals, naschids durant il temps da pandemia, a restar en il program en il rom dils digidays #2. Ed in toc che schai spezialmain a cor al directur è «Peiden», ina producziun bilinguala scritta da Weishaupt sez, cun il star Bruno Cathomas.
«Nus essan s'accorschids che nossas mammas arrivan omaduas da Peiden, in vitg che ruschna sumegliant sco Brinzauls da la plaunca giuador. Lura avain nus creà ina saira fitg persunala che cumbinescha istorgias dal vitg da Peiden cun istorgias persunalas da Bruno Cathomas.»
La visiun è la medema
La producziun Peiden para uschia pia dad ir a prà cun la visiun che Roman Weishaupt ha gì formulà a l'entschatta da sia carriera sco directur dal teater Cuira. El vuleva metter dapli paisa sin temas regiunals, sin diversitad e sin la participaziun dad in e scadin. Ina visiun che para er da plaschair al public, almain di il directur ch'ils resuns dals ultims onns sin il program sajan stads en general fitg positivs. E las cifras? «Nus avain sentì ferm, cur ch'il Cussegl federal ha abolì tut las mesiras da segirezza». Dapi l'avrigl sajan las cifras da visita vid crescher.