«Espaces Imaginaires» è in'exposiziun en il Spazi Spescha che vul experimentar las ovras da Matias Spescha cun envidar artists contemporans. La finamira da quella exposiziun saja da crear in dialog tranter duas posiziuns: quella da Spescha e quella da Mathis, declera la curatura da l'exposiziun Seraina Peer.
«La cumbinaziun da quests dus artists funcziuna fitg bain, perquai ch'els han sumegliants interess, s'expriman dentant a moda differenta. Quai fiss il spazi, il spazi creà en l'art, il spazi fisic mabain er il spazi imaginar», di Seraina Peer.
Matias Spescha ch'è mort 2008 ha fatg quai cun pictura, sculpturas e graficas. Esther Mathis che viva e lavura a Turitg fa quai cun installaziuns, videos u ovras en moviment. Tut tenor nua ch'ins stat ed observa in'ovra, ves'ins in'autra. Il gieu cun il spazi sa mussa tar Mathis per exempel tar ina sculptura d'aluminium. Sch'ins mira plitost frontal lura ves'ins tras las rusnas, sch'ins guarda da la vart, lura ves'ins dapli umbrivas e la sculptura para d'esser solida.
Uschia duai l'exposiziun er animar d'observar las ovras d'igl in entras la perspectiva da l'auter. Esther Mathis di che l'ovra da Matias Spescha saja adina stà preschent durant crear quella exposiziun. I saja stà fitg bel da sa fatschentar cun sia lavur.
Matias Spescha è naschì ils 17 da fanadur 1925 a Trun e mort ils 28 da zercladur 2008 a Turitg. Suenter l'emprendissadi da cusunz en fabrica da ponn a Trun ha el lavurà là sco chau cusunz e manader da la participaziun. La lavur cun las grondas tailas gida a tschiffar proporziuns e furmas che sa mussan pli tard sco fundament da sia lavur d'artist.
Matias Spescha è da chattar en ina retscha cun renumadas artistas ed artists grischuns sco Alberto Giacometti è Not Vital, scriva Trun Cultura en ina communicaziun a las medias. La culminaziun da sia ovra saja stada la sculptura Ogna.
Il Spazi Spescha è vegnì avert il zercladur 2023 e sa chatta en l'emprima auzada dal bajetg da l'anteriura favbrica da ponn a Trun, construì 1961.
