Tranter 1995 e 2011 ha il Servetsch archeologic dal Grischun scuvert a Tumegl perditgas architectonicas d’ina perioda da passa 1'000 onns. Paucs cumplexs sacrals en Svizra èn perscrutads ozendi uschè bain sco Sogn Murezi a Tumegl.
Tranter mirs da quatter meters autezza, ossa d’animals e stgaglias da vaider han ils archeologs chattà ina baselgia dal settavel tschientaner ed uschia probablamain in dals centers da la cristianisaziun en il Grischun. Ils chats laschan supponer ch’ils clerichers e lur giasts n’han betg mo celebrà qua rituals liturgics, mabain er slamuzzà spisas exquisitas.
Quai èn be intginas da las conclusiuns che l’archeologa Ursina Jecklin-Tischhauser preschenta en sia dissertaziun cumparida questa primavaira. L’autura raquinta a Vita e cretta da sia lavur da detectiv, tge che buccas finas han mangià avant 1'500 onns e tge che las inscripziuns misteriusas vid l’altar da Sogn Murezi tradeschan da la vita cristiana da lezzas uras.
