Las stgargiadas d'alp cun animals decorads enconuschan ils blers, tge che stat davos la tradiziun è dentant in tant nunenconuschent. Sch'ins auda il pled stad ad alp aud'ins stgellas da vatgas, pensa vid prads si en ils auts, cresta tgiet sin la prada e lais da muntogna clers. Forsa han ins er gia en il nas il fried da chaschiel e percorscha il vent frestg en fatscha.
Tge vegn festivà cun la stgargiada d'alp?
La vita si d'alp è bella, dentant er strentga. Ils pasturs e las pasturas mulschan baud la damaun ils animals ed èn responsabels per proteger els. La muaglia da puras e purs vegn la stad ad alp, ord lur latg producescha il signun chaschiel e paintg ed auters products. Cura che la stad s'enclina maina il persunal d'alp ils animals decorads cun fluras ed auter enavos en la val. Il di da stgartgiada vegniva pli baud festivà, anc oz datti d'admirar en enqual lieu dal Grischun grondas festas da stgargiada.
La finiziun da la stad ad alp vegn festivada cun canera ed en in vestgì giagl. Per l'usit ch'i dat gia dapi tschientaners vegnan las vatgas ornadas cun flurs e survegnan grondas plumpas. Aschia per exempel er al spectacul d'alp en il Partenz, ch'è da vesair en il slowstream da RTR. Las passa 100 vatgas decoradas e las numerusas chauras e nursas turnan enavos en il vitg e quai cun davostiers la bellezia culissa da la muntogna dal Scesaplana. Lura vegn fatg fiasta ed engrazià sch'i n'ha dà nagins accidents ed incidents pli gronds durant la stad ad alp. La festa è mintgamai il settember e vegn accumpagnada da musica da tibas e sgurgialaders, da cumprar datti chaschiel d'alp ed auter pli vid stans da martgà. In ulteriur punct culminant è la concurrenza da bellezia – en il Partenz vai betg per la pli bella vatga, mabain per la pli bella barba.
Las lavurs dals chaus d'alp
