Siglir tar il cuntegn

Header

video
Art dal Baselgia
Or da Cuntrasts dals 29.08.2021.
laschar ir. Durada: 25 minutas 11 Secundas.
cuntegn

Cuntrasts Art dal Baselgia

Ils 29 d’avust è la vernissascha da la nova exposiziun da l'artist da Lantsch Mirko Baselgia. Per il Kunst(Zeug)Haus a Rapperswil-Jona ha el creà ils davos mais tut ovras novas. La producziun è stada pretensiusa e difficila, ella ha duvrà bler temp e blera gnerva. A fin èn las ovras stadas pir curt avant l’avertura.

Igl è schon in pau stress, dentant igl è per cletg mo in tschert temp.
Autur: Mirko Baselgia Artist

Ina lavur che ha duvrà ordvart bler temp da producir è la «Tartaruga Indien Times». Cun ediziuns da la gasetta Indien Times è vegnì construì il panzer d’ina tartaruga. Mintga collina dal panzer consista ord 110 retagls da gasetta. L’idea da l’ovra: Per mintga artitgel en la gasetta, per mintga fotografia, per mintga ediziun è vegnì duvrà temp. «Nus prendain tut il temp ch’è gia concentrà en ina gasetta e concentrain el er en nossa lavur, in destillat da temp», explitgescha Mirko Baselgia.

Mirko Baselgia cun ses object d'art «Tartaruga Indien Times».
Legenda: Mirko Baselgia cun ses object d'art «Tartaruga Indien Times». RTR
Quai ha plaschì a mai, da vesair ils onns d’ina biografia dad in animal sco tar in pign.
Autur: Mirko Baselgia Artist

Tut las ovras da l’exposiziun èn vegnidas producidas ad Alvaschagn en las localitads da l’anteriura chasa da scola. En quella ha Mirko Baselgia ses atelier dapi l’entschatta 2021. Per pudair realisar l’exposiziun ha el duvrà plirs gidanters e gidantras, tuts engaschads per in tschert temp.

Mirko Baselgia ed ina part da sias collavuraturas e ses collavuraturs.
Legenda: Mirko Baselgia ed ina part da sias collavuraturas e ses collavuraturs. RTR

Vegnì entras la tatta tar l'art

Mirko Baselgia (1982) è creschì si a Lantsch. Ch’el è vegnì da buob en contact cun art è il merit da sia tatta. Ella ha dà al buob dad 11 onns trais cudeschs, in da Michelangelo e las duas biografias da van Gogh ed Alberto Giacometti. Quests cudeschs han inspirà Mirko Baselgia ed el ha immediat cumenzà a far sculpturas. Suenter la scola han ils geniturs vulì savair nagut d’ina scola d’art. L’emprim ha el gì da far in emprendissadi, el ha emprendì dissegnader da construcziun auta.

Ins avess era pudì serrar en mai. Il davos fiss jau en mintga cas daventà artist.
Autur: Mirko Baselgia Artist

Dus mais avant la vernissascha da la gronda exposiziun a Rapperswil-Jona en il Kunst(Zeug)Haus èn anc tut las ovras en lavur, nagina è a fin. L'artist Mirko Baselgia sa lascha betg inquietà, el expona dapi onns regularmain ed enconuscha perquai il squitsch ed il stress avant las exposiziuns.

Jau hai pensà: In artist sesa en in atelier à la Giacometti. Per il mument è quai dentant la pitschna part da mia lavur.
Autur: Mirko Baselgia Artist
video
Mirko Baselgia ha creà novas ovras
Or da Telesguard dals 27.08.2021.
laschar ir. Durada: 3 minutas 36 Secundas.

Ord l'archiv

video
L'artist Mirko Baselgia cumbatta per indemnisaziuns
Or da Telesguard dals 18.02.2021.
laschar ir. Durada: 4 minutas 25 Secundas.

Cuntrasts

Artitgels legids il pli savens