Malgrà ch’els han absolvì ina scolaziun mercantila, èn omadus frars Schnoz ì lur via professiunala en direcziun cultura. Andi ha studegià ghitarra a la scola da Jazz Son Gagl e lavura oz sco magister da musica e musicist. Ses frar René ha fatg la scola da teater a Turitg e lavura oz sco actur e reschissur. Cun la producziun «Der schwarze Tod» han els lavurà per la dieschavla giada ensemen.
Nus lavurain gugent ensemen e stimain omadus la professiunalitad da tschel. Nus lavurain dentant er gugent cun auters. Nossas collavuraziuns n'han betg in ritmus. Quai sto sa dar.
Il toc sut tschiel avert «Der schwarze Tod» ha survegnì tras la reschia da René Schnoz e la musica da ses frar Andi ina tempra che ha fascinà l’auditori. Tut las preschentaziuns èn stadas vendidas ora ed han carmalà passa 10’000 persunas a Mosnang en il Toggenburg.