S'inamurads en ina claustra
Il duo artistic Madalena e Nik Steven ha lavurà ils ultims set onns vi da sia pli grond’ovra. En Spagna, en la Catalugna ha il pèr sanà ina claustra – il Convento de San Lorenzo. Cura ch'els han cumprà quella era ella en in stan mediocher ed els dus cun bunamain 60 onns betg pli ils pli giuvens.
Cura che nus avain vis la claustra ha Nik ditg «I love it» ed jau «I want it». E quai èsi stà.
L'origin da Madnik
Il Convento de San Lorenzo è il tschintgavel bajetg ch’il duo artistic cumpra e sanescha cumplettamain. Cumenzà ha tut ils onns 1980 a Gozo sin l’insla Malta nua ch’il pèr ha cumprà avant bunamain 40 onns ina ruina e sanà quella dad A fin Z. Daners n'avevan els nagins da lezzas uras. Percunter massa creativitad, gust ed inschign. Cun urden ch’els han chattà sin ina deponia, han els creà lur nov da chasa.
Cura che nus avain vis las chaussas che la glieud aveva bittà sin la deponia è quai stà sco Nadal e Pastgas e natalizi per nus.
A Gozo naschan lur figlias Luna ed Estella. Sin l’insla nascha era il duo artistic Madnik la cumbinaziun da Madalena e Nik.
Lur chasas – lur spendrament
Nik lavura da quel temp sco designer. El cula da tuttas sorts urden da maisa en bronz ed en zin. Suenter 12 onns va la famiglia vinavant en Frantscha. Puspè cumpra la famiglia ina chasa veglia e sanescha quella en il stil da Madnik. En Frantscha spera Nik da fitgar pe cun sias chaussas da design. El po exponer a Paris ed a New York. Cunquai ch’el creescha e producescha tut sez, n'ha el dentant nagina schanza da concurrenzar al martgà cun ils gronds.
Cunquai che nus avain vivì nossa vita cun noss art e libramain sco quai che nus avain vulì, è il pretsch magari stà quel ch'igl ha mancà dapertut.
I na basta ni davant ni davos. La famiglia sto vender la chasa ed ir vinavant. La medema istorgia sa repeta en trais ulteriurs lieus.
A la fin han nossas chasas ans spendrà. Nunconscient eran nossas chasas bunas investiziuns.
-
Bild 1 von 12. Il Convento de San Lorenzo en Catalugna. Bildquelle: RTR, Petra Rothmund.
-
Bild 2 von 12. Il Convento de San Lorenzo avant la sanaziun. Bildquelle: RTR, Petra Rothmund.
-
Bild 3 von 12. Uschia guardava l'anteriura claustra or endadens avant la sanaziun. Bildquelle: RTR, Petra Rothmund.
-
Bild 4 von 12. Madnik. La cumbinaziun da Madalena e Nik – il num dal duo artisitc. Bildquelle: RTR, Petra Rothmund.
-
Bild 5 von 12. Madalena e Nik Steven. Bildquelle: RTR, Petra Rothmund.
-
Bild 6 von 12. Madalena e Nik Steven durant cular ina sculptura en alumini. Bildquelle: RTR, Petra Rothmund.
-
Bild 7 von 12. Madalena Steven e sia ovra «Nebenwirkungen». Bildquelle: RTR, Petra Rothmund.
-
Bild 8 von 12. «Nebenwirkungen» – in'ovra da Madalena Steven. Bildquelle: RTR, Petra Rothmund.
-
Bild 9 von 12. «Nebenwirkungen» – in'ovra da Madalena Steven. Bildquelle: RTR, Petra Rothmund.
-
Bild 10 von 12. Cuppa per spaghettis – in'ovra da Nik Steven. Bildquelle: RTR, Petra Rothmund.
-
Bild 11 von 12. «Space Oddity» – in'ovra da Nik Steven. Bildquelle: RTR, Petra Rothmund.
-
Bild 12 von 12. La deponia a Gozo sin l'insla Malta. Bildquelle: RTR, Petra Rothmund.
L'art sco spendrament
Madalena fa ses art ord urden duvrà ch’ella chatta sin la deponia u sin martgads da plugls. Chaussas isadas e duvradas che na valan per ils blers nagut, èn per ella stgazis. Cura ch'igl è stà dir en sia vita è l'art stà in spendrament per ella.
Jau ma sun lubida dad ir en quest mund e far mias chaussas ed uschia far si sco in mir enturn mai. Cura che jau erel en quest mund na pudeva nagut far a mai tema u quitads.
Cun umor ed optimissem
Oz vivan Nik e Madalena en ina part da la claustra sanada cun ina surfatscha da 700 meters quadrats. En l‘autra part han els creà in air B&B nua ch’els beneventan osps da vacanzas da dapertut enturn. Suenter set onns pulvra e strentgas lavurs sin il plazzal spera il duo artistic da puspè avair dapli temp per far ses art.