Tuts trais han survegnì il medem tema, numnadamain «dis da litteratura». Romana Ganzoni ha immediat gì gust da scriver ina cumedia dad orrur. Viola Cadruvi ha l’emprim schemì, cura ch’ella ha legì il tema. Ella spetgava in titel main profan. Leo Tuor n'ha betg savì entschaiver en las massas cun quest titel. Scrit ha el dentant tuttina ina istorgia.
Il lieu da scriver
Viola Cadruvi va en ses café preferì, il café Freud per scriver. Ella dovra in café, in cornet cun tschigulatta, ses laptop, il carnet da notizias e ses uregliers. Musica en las ureglias è per ella indispensabel per savair scriver, per sa sfundrar en l’atmosfera dal text. Mintgin da ses texts ha sia atgna playlist. Leo Tour scriva en ses biro circumdà da plunas retschas da cudeschs, cudeschs sin curunas, cudeschs giun plaun, cudeschs sin maisa ed er sin maisa ina starmenta tschuetta da lain e sur las curunas cornas da chamutsch. Scriver sin commando e sin termin n’è betg sia chaussa. Cuntrariamain Romana Ganzoni, ella appreziescha incumbensas da scriver ed ina deadline concreta. Ses lieu da lavur è savens ses biro. Qua stat mintga fegl, mintga fieuter en ses lieu, urden perfetg, tut picobello.
La fin
E cura è in text a fin? Per Viola Cadruvi il pli gugent cura ch’ella ha tschentà il davos punct. La lavur che suonda, curreger sbagls, controllar che tut constat, scursanir, tut quellas lavurs fa ella navidas. Quai saia in «crampf». Era Roman Ganzoni e Leo Tour n’elavuran betg gugent lur texts. Il bel è il scriver, na il repassar e reelavurar.
Ils texts finals da las auturas e l'autur
Leo Tuor – dis da litteratura
Romana Ganzoni – la mazzacra da Domat
Viola Cadruvi – escapissem
