Anouk, Lio, Dinea ed Aramis èn quatter chauns che han ina professiun, chauns che han la gronda responsabladad da gidar e salvar persunas. Chauns che sa distinguan dal chaun da famiglia en il senn ch’els ston supportar bler stress e canera. Per lur servetschs specifics vegnan els tratgs, tschernids e scolads. Ils Cuntrasts accumpognan ils quatter chauns e lur possessurs tar lur scolaziun, durant exercizis e lur servetsch.
In nas fin
Anouk, la chogna nursera beltga, tutga al policist chantunal Patrick Maridor. La spezialitad da la chogna è proteger persunas e chattar chaussas explosivas. Durant in exercizi tschertga ella meds explosivs en in jeep militar. Ses nas savura in milliun giadas meglier ch’il nas dal carstgaun. E grazia a ses nas fin chatta ella il giavischà senza fadias.
Salvament sin quatter pattas
Lio e Yari, ils dus retrievers dad aur da Corsin Clopath, èn dus chauns da lavinas e lavuran per il Salvament alpin svizzer. Lio è uss pensiunà e surlascha la lavur a ses giuven collega Yari, in chaun cun in viv temperament, strusch da franar. Quai èn caracteristicas idealas per in chaun da lavinas. Anc na sa Yari betg salvar persunas or da la naiv. El è anc vid d’emprender. Ils Cuntrasts accumpognan el e ses patrun Corsin Clopath sin l’Alp Nagens durant in exercizi. Cun gronda perseveranza sto il chaun chavar ina persuna or da la naiv.
Far bain a l'olma
Dinea, il chaun da Daniela Piccoli, è in chaun da terapia. Regularmain visitan el e sia patruna duas dunnas en la chasa d’attempads Kantengut a Cuira. Las duas cussadentas spetgan mintgamai vess sin la visita da «lur» chaun. Chauns da terapia lavuran en scolas, van tar carstgauns cun impediments, tar malsauns e moribunds. Chauns per tals servetschs ston avair gugent carstgauns ed esser resistent al stress. Dinea fa gugent sia lavur, ma suenter la visita è el stanchel.
Experts per catastrofas
Il chaun da salvament Aramis tutga a Allessandro Capaul. En las ruinas dal areal da la protecziun civila Meiersboden exerciteschan chaun e patrun regularmain ensemen cun l’uniun Redog. Senza problems chatta Aramis las persunas zuppadas en las ruinas.
Walter Caprez, il president da la secziun grischuna da Redog è stà avant 11 onns a Fukushima cun la gruppa da salvament Redog. Cun nov chauns han els tschertgà unfrendas dal tsunami, deplorablamain senza success.
Anouk Merz ed Alessandro Capaul e lur chauns da militar
Allessandro Capaul, lainari da Lumbrein, fa militar sco manader da chauns. Ses chaun Aramis ha el survegnì da l’Armada svizra. Uss tutga il chaun dentant cumplainamain ad Allessandro Capaul, suenter la recruta ha el puidì cumprar il chaun dal militar. Aramis è in chaun nurser beltg, in Malinois da sis onns. El e sia amia Anouk Merz, che fa medemamain militar sco manadra da chauns, lavuran cun lur chauns gratuitamain per l’uniun Redog. Cun lur dus chauns Aramis e Jago treneschan els en l’uniun la tschertga da persunas sutterradas. En cas d’urgenza vegnan ils chauns duvrads tar terratrembels, bovas, explosiuns, dapertut là nua che persunas èn sutterradas.
Il film «Da professiun: Chaun» da la cineasta Menga Huonder-Jenny vegn mussà dumengia ils 19 da favrer, las 11.00 en il kino Apollo a Cuira.
