Mintga carstgaun ha ina dentadira unica, analog a l’impronta dal det u la DNA. Perquai gioga la dentadira era ina rolla en la forensica. Tut tenor quant fitg ch’ils dents èn isads e tge posiziun ch’els han, pon ins chattar ora bler d’ina persuna. Quasi: cun morder chattan ins il morder. Dapli gieus da pleds en noss prolog murdent.
En in’entira vita mastgan e manizzan ils dents var 18'000 tonnas mangiativas. I n’è pia betg ina surpresa, ch’il muscul da mastgar è il pli ferm muscul dal corp. Cun morder sin ils dents pon ins sviluppar forzas enormas. In ch'ha gì da morder bler sin ils dents è il biatlet Eligius Tamobornino. Malgrà ch’el ha mai propi fatg furora en il sport ha el cumbattì passa 20 onns. Ils davos mais ha el dà tut per sa qualifitgar la davosa giada per ils gieus olimpics.
Ellas èn mo in millimeter grondas – las zeccas. Ma savens èn ils animals ils pli pitschens, ils pli privlus per ils carstgauns. Ina morsa basta ed en in da tschient cas dat la zecca vinavant las bacterias da borreliosa. Ina malsogna perfida. Mintg’onn s’infecteschan en Svizra fin a 10'000 persunas cun borreliosa. Co ch'ina tala morda po midar la vita mussa l’exempel da Mario Candreia.
