Siglir tar il cuntegn

Header

cuntegn

Cuntrasts Dus films rumantschs al festival da film a Soloturn

Films en la quarta lingua naziunala: Radiotelevisiun Svizra Rumantscha (RTR) è preschent cun dus films da «Cuntrasts» al festival da film Soloturn. Da vesair èn «La meztga da chasa a Schlans» ed il film «Gion Gieri – il scolast dal vitg chala». Il festival cumenza ils 18 da schaner 2023.

Ils responsabels dal festival da film Soloturn han selecziunà per l’ediziun 2023 dus films dals «Cuntrasts» da RTR. En il film «La meztga da chasa a Schlans» accumpogna Bertilla Giossi durant l’entir di da meztga la famiglia Pfister da Schlans. Ozendi èn ils Pfisters ils unics en Surselva che fan meztga da chasa. Il film è da vesair ils 21 e 24 da schaner a Soloturn.

video
Meztga da chasa a Schlans
Or da Cuntrasts dals 09.01.2022.
laschar ir. Durada: 25 minutas 40 Secundas.

En il film «Gion Gieri – il scolast dal vitg chala» da Petra Rothmund stat Gion Gieri Sgier en il center. Suenter 44 onns sco scolast da l’emprima classa primara va el en pensiun. Mussà vegn il film ils 19 ed ils 23 da schaner 2023.

video
Gion Gieri – il scolast dal vitg chala
Or da Cuntrasts dals 10.07.2022.
laschar ir. Durada: 26 minutas 4 Secundas.

La retscha da films documentars da RTR «Cuntrasts» consista per 99% d’atgnas producziuns. Auturas ed auturs èn collavuraturas da RTR sco era cineasts libers che guardan e mussan la vita en il Grischun e la Svizra rumantscha tras lur camera. «Cuntrasts» èn istorgias tar temas politics, sociologics, economics, culturals, religius ubain er sportivs. Da vesair èn las producziuns rumantschas mintgamai la dumengia a las 17:25 sin SRF1 (cun titels tudestgs).

Plinavant va il film «I Giacometti» a Soloturn en concurrenza per il «Prix du Public» e vegn mussa duas giadas: gievgia ils 19 da schaner e dumengia ils 22 da schaner. Quest film ha RTR co-producì. Il film mussa l'istorgia da la famiglia d'artists Giacometti.

RTR Cuntrasts

Artitgels legids il pli savens