Siglir tar il cuntegn

Header

video
Gion Gieri – il scolast dal vitg chala
Or da Cuntrasts dals 22.08.2021.
laschar ir
cuntegn

Cuntrasts Il scolast dal vitg chala

Insaquantas giadas vegni auter en la vita che spetgà. Uschia er tar Gion Gieri Sgier da Sevgein. Suenter la patenta da scolast primar l'onn 1977 haja el gì ina clera idea da sia carriera professiunala. Numnadamain d'instruir scolaras e scolars en il stgalim superiur e da midar mintga 10 onns lieu. Ma igl è vegnì tut auter.

Jau sun vegnì a Sevgein, lura hai dà la constellaziun che jau hai adina gì ils pitschens ed jau sun restà qua per adina
Autur: Gion Gieri Sgier Scolast

Scolast enstagl augsegner

Era vegnì auter che quintà esì gia tar la schelta da clamada en ses giuvens onns. Gion Gieri Sgier crescha si ad Andiast en ina famiglia da purs. Cura ch'el va en la sisavla classa avess el mustgas da daventar augsegner. Perquai s’infurmescha el tar il prer.

Lura ha quel ditg ch'jau stoppia ir si Mustér en claustra a scola. Mes bab stoppia dentant vender sin il pli pauc ina vatga e dus taurs per ch’el possia pajar la scola. Quai aveva fatg curius a mai. Mes plaschair è uschia stà davent .
Autur: Gion Gieri Sgier Scolast pensiunà

Scolast dal vitg durant 44 onns

Enstagl augsegner daventa Gion Gieri Sgier pia scolast primar. 44 onns dat el scola a las emprimas classas a Sevgein. Sper dar scola èn las uniuns e la vita culturala dal vitg elements centrals en la vita da Gion Gieri Sgier. El mussa durant 43 onns da sunar flauta, fundescha e dirigia la musica da giuvenils Steilalva, dirigia 26 onns il chor, organisescha sairas da gimnastica per creschids, daventa catechet e surprenda adina puspè auters posts en vischnanca.

Mia mamma è stada savens la culpa. Lezza scheva adina: Sche Ti has la paja en vischnanca stoss era far insatge. E Gion Gieri ha adina ditg gea.
Autur: Gion Gieri Sgier Scolast pensiunà
video
Il vitg da Sevgein prenda cumià da ses scolast
Or da Telesguard dals 19.08.2021.
laschar ir

Scolast da pliras generaziuns

Anno 77 cumenza Gion Gieri Sgier cun nov scolars. Avant è la scola a Sevgein serrada per set onns pervi da mancanza d'uffants. Il temp sgola e muments sa repetan: Scolars e scolaras da pli baud èn oz babs e mammas das ses scolars actuals.

Jau n'hai anc mai ditg ad in uffant che ses bab u sia mamma fascheva quai meglier u mender. Mintgatant eri gist cuntrari da la mamma u il bab.
Autur: Gion gieri Sgier Scolast pensiunà

Vegnì e restà

Ozendi midan scolasts magari plazza suenter inqual onn per pudair ir en in auter lieu. Auters midan schizunt mastergn e fan carriera en in’autra clamada. Ord il plan oriund da Gion Gieri Sgier da dar scola sin il stgalim aut e da midar lieu mintga 10 onns n'èsi daventà nagut. Cun in surrir en fatscha manegia l'um pensiunà oz:

Forsa è quai schont stà in zic cumadaivel dentant hai jau gì qua uschè bel. Daco ir a tschertgar insatge meglier u forsa er mender.
Autur: Gion Gieri Sgier Scolast pensiunà
Legenda: Il davos di sco scolast primar per Gion Gieri Sgier. RTR, Petra Rothmund

Cuntrasts

Artitgels legids il pli savens

Scrollar a sanestra Scrollar a dretga