Siglir tar il cuntegn

Header

cuntegn

Cuntrasts Ils Giacomettis – ina famiglia straordinaria

Blers enconuschan l’artist Alberto Giacometti, mo paucs enconuschan detagls da sia derivanza. In nov film da Susanna Fanzun prenda sut la marella a la famiglia zunt creativa.

La famiglia d’artists Giacometti è unica. Dal bab Giovanni, a la mamma Annetta tar ils uffants Alberto, Diego, Ottilia e Bruno eran in e scadin en ina moda u l’autra creativs. Tuts èn naschids en Bregaglia e ruaussan sin il santeri da Borgonovo, in vitget al pe da taiss culms da granit.

Borgonovo, Bregaglia
Legenda: Borgonovo en Bregaglia. RTR

La cuntrada ha furmà ils Giacomettis ch’eran cultivads e cosmopolits. Il barat cun autras culturas ed auters artists era ina part impurtanta da lur vita. La convivenza famigliara intensiva ha creà ina premissa extraordinaria per il svilup artistic dals uffants.

Ils uffants Giacometti: Diego, Ottilia, Bruno ed Alberto
Legenda: Ils uffants Giacometti: Diego, Ottilia, Bruno ed Alberto MAD

La reschissura Susanna Fanzun era gia d’uffant fascinada da las illustraziuns dal cudesch «Parevlas Engiadinaisas» da Giovanni Giacometti.

audio
Cuntrasts: «La famiglia sut la lampa – ils Giacomettis» cun Susanna Fanzun
ord Actualitad dals 20.01.2022.
laschar ir. Durada: 8 minutas 10 Secundas.

Las picturas èn s’imprimidas en sia memoria. Sco autura da film è ella sa deditgada adina puspè cun ils Giacomettis. Per exempel ha ella per il 100avel anniversari dad Alberto Giacometti realisà avant 20 onns per RTR il film «Nos Alberto». En ses nov film «La famiglia sut la lampa – ils Gicaomettis» suonda ella il vial da la entira famiglia. Tge è il misteri dal success da questa famiglia?

La famiglia Giacometti cun la mamma Annetta e bab Giovanni.
Legenda: La famiglia Giacometti cun la mamma Annetta e bab Giovanni. MAD

Suandond las ovras d’art dals Giacomettis mussa il film en il cor da la famiglia, uschè sco ch’ils Giacomettis han vis lur mintgadi. Il raquint vegn cumplettà cun citats or da brevs per part nunenconuschentas e cun intervistas cun perditgas dal temp, expertas ed experts. Il film «La famiglia sut la lampa – ils Giacomettis» sa differenziescha dad auters films cun quai che Fanzun raquinta l’istorgia cun in’egliada feminina. Ella reflectescha la rolla centrala da la consorta e mamma Annetta Giacometti-Stampa e sia influenza sin ses um ed ils uffants talentads.

video
«Nos Alberto»
Or da Cuntrasts dals 30.09.2001.
laschar ir. Durada: 25 minutas 23 Secundas.

RTR Cuntrasts 17:25

Artitgels legids il pli savens