Cun be 21 onns cumpra Janic Andrin Spinnler in bain puril en la Val Müstair, senza agens raps e cun ina dunna ch’el enconuscha pir dapi intgins mais. I saja simplamain stà ina gronda schanza raquinta il giuven Jauer:
Cur che quest bain è vegnì liber, n'hai jau ponderà l’emprim che jau saja memia giuven e che quai na giaja betg finanzialmain. Ma mia famiglia na posseda betg in bain che jau pudess surpigliar en in pèr onns, e perquai hai jau tuttina decis ch’i fiss d’empruvar.
Cun emprests e cun in credit da la Societad agricula dal Grischun ha il giuven Jauer cumprà il bain da 25 hectaras terren. L’avrigl 2020 ha il giuven pèrin cumenzà cun ina pitschna scossa da vatgas-mamma e cun 400 ovunzas. Dapi in onn e mez èn els ussa lur agens patruns. L’entschatta saja stada fitg turbulenta, colliada er cun dubis e temas d’existenza, di Janic Andrin Spinnler:
Jau hai realisà mes siemi da la vita. Igl è bel d’esser l’agen schef. Ins po lavurar cun la natira e cun ils animals. E nus empruvain da far qua en la Val Müstair products d’auta qualitad. Jau crai che tals products sajan pli e pli dumandads dals consuments. Da l’autra vart è la responsabladad gronda e nus stuain star bun per nossas decisiuns.
En lur vegliadetgna na saja quai betg adina uschè simpel, manegia Spinnler. Els stoppian anc rimnar experientschas ed emprender. Ma l’agricultura e la vita sco purs saja ina buna via, ina via cun futur.