Cuntrasts - L'attentader grischun – L'affera Moritz Conradi
Avant 100 onns procura in attentat a Losanna per ina crisa statala tranter la Svizra e la Russia – la culpa è il randulin grischun Moritz Conradi. Sia famiglia era crudada en pitgira causa la Revoluziun russa, e per vendetga mazza Conradi ils 10 da matg 1923 il diplomat russ Vazlav Worowski.
Igl è in'istorgia sco or d'in roman criminal u thriller politic, l'istorgia da l'attentat da Moritz Conradi. Il cas aveva procurà en ils onns 1920 per lingias grassas en la pressa internaziunala e per gronds virivaris diplomatics. Ma oz, 100 onns suenter l'omicidi, para l'affera Conradi bunamain emblidada.
Legenda:
Ils 10 da matg 1923 sajetta Moritz Conradi en l'hotel Célin a Losanna il diplomat russ Vazlav Worowski
Archiv da polizia dal chantun Vad
Il film «L'attentader grischun e la revoluziun»
Avrir la boxSerrar la box
En occasiun da centenari da la Revoluziun Russa aveva RTR e la SRG SSR collavurà il 2017 per in film documentar davart quest cas istoric.
L'autura independenta Helen Stehli Pfister è casualmain vegnida fatga attenta sin l'Istorgia da Moritz Conradi, ed è vegnida intimada da far in film documentar. Suenter emprimas retschertgas n'ha Conradi betg pli laschà liber l'autura da films documentars. Ella ha fatg lungas ed intensivas retschertgas, surtut a Petersburg. Là è Moritz Conradi numnadamain naschì e creschì en ina famiglia bainstanta oriunda d'Andeer. La fabrica da tschigulatta Conradi è stada in da las grondas en Russia. Ses avegnir pareva grondius. L'Emprima guerra mundiala e la Revoluziun russa han però fatg stremblir il mund da Moritz Conradi – enfin a la crisa statala.
In'uffanza en bainstanza
audio
100 onns affera Moritz Conradi part 1
06:19 min, ord Actualitad dals 10.05.2023.
Maletg: ARCHIV POLIZIA VAD
laschar ir. Durada: 6 minutas 19 Secundas.
audio
100 onns affera Moritz Conradi part 2
06:07 min, ord Actualitad dals 10.05.2023.
Maletg: ARCHIV POLIZIA VAD
laschar ir. Durada: 6 minutas 7 Secundas.
Moritz Conradi era creschì si a St. Petersburg en plaina bainstanza. Ses tat, pastizier ed oriund d’Andeer, ha fabritgà si cun success en Russia in'atgna fatschenta. Ma tut il possess sballuna suenter la Revoluziun russa il 1917, insaquants confamigliars vegnan mazzads, auters vegnan da scappar. Moritz Conradi returna cun 25 onns en Svizra ed engira vendetga.
1 / 8
Legenda:
Ils fabricants da dultschims
Moritz Conradi è naschì ils 10 da zercladur 1896 a St. Petersburg, sco figl da geniturs bainstants.
SIGRID SCHLEGEL-CONRADI
2 / 8
Legenda:
Ils Conradis e la revoluziun
La Revoluziun russa dal 1917 destruescha era la vita da la famiglia russ-svizra dals Conradi a St. Petersburg. Moritz Conradi, davosvart a dretga.
SIGRID SCHLEGEL-CONRADI
3 / 8
Legenda:
La datscha dals Conradis
En il temps da l’uffanza da Conradi e da giuventetgna regia anc il zar Nicolaus II en l'imperi russ. Ils Conradis fan savens vacanzas en lur datscha.
SIGRID SCHLEGEL-CONRADI
4 / 8
Legenda:
L'arma
L'arma per l'attentat, ina pistola dal tip Browning, cumpra Moritz Conradi a Turitg. Ina reinscenaziun or dal film «L'assassin grischun e la revoluziun».
Film documentar «L'assassin grischun e la revoluziun»
5 / 8
Legenda:
La brev da confess
Curt avant il murdraretsch al diplomat sovietic Worowski scriva Conradi anc ina brev da confess – ina reinscenziun en il film «L'assassin grischun e la revoluziun».
Film documentar «L'assassin grischun e la revoluziun»
6 / 8
Legenda:
Ils davos onns en Grischun
Ses davos onns ha l'attentader vivì en il Grischun. El n'ha betg gì agens uffants, la poppa sin bratsch è sia nezza Sigrid. Moritz Conradi è mort dal 1947 a Cuira.
ALBUM SIGRID SCHLEGEL-CONRADI
7 / 8
Legenda:
L'experta en l'affera Conradi
Annetta Caratsch s'ha occupada en sia dissertaziun «L'affera Conradi» cun l'attentader, l'istorgia e las consequenzas da l'attentat e sco era dal process encunter Conradi.
Film documentar «L'assassin grischun e la revoluziun»
8 / 8
Legenda:
La nezza sa regorda
Sigrid Schlegel-Conradi, la nezza da Moritz Conradi, sa regorda dal temp che ses basat era emigrà sco pastizier en Russia.
Film documentar «L'assassin grischun e la revoluziun»
L'attentat ed in process politic
Legenda:
Maletg da polizia da Moritz Conradi 1923
Archiv da la polizia dal chantun Vad
Ils 10 da matg 1923 sajetta el a Losanna Vazlav Worowski, in diplomat sovietic d’aut rang e persuna da confidenza da Lenin. Conradi sa lascha arrestar, confessa il murdraretsch e vegn avant tribunal l'atun 1923. Ma il process è in scandal: Ina dretgira da giuraders declera Conradi per innocent. La giuvna Uniun sovietica è indignada ed interrumpa tut las relaziuns cun la Svizra. Varga 20 onns pateschan l’economia e la politica exteriura svizra da quest attentat e sia sentenzia. Conradi sez mora il 1947 a Cuira, segnà dal alcoholissem.
