Problems da sanadad accumpognan Ladina Näff da pitschen ensi. Tar ella èsi vegnida constatada numnadamain gia da poppa ina disfuncziun dals gnirunchels. In sbagl genetic, l’emprim cas en famiglia.
Suenter che l’Engiadinaisa ha survegnì cun 26 onns in gnirunchel da sia mamma, ha ella pudì viver dentant plirs onns ina vita normala - enfin il 2019. Dapi lura è tut vegnì mess sin il chau. Il gnirunchel n’ha betg pli funcziunà sco giavischà. La consequenza: 3 giadas l’emna per mintgamai 4 uras ir a far dialisa en il proxim grond ospital. Ina procedura franc d’impurtanza vitala, dentant era ina che absorbescha betg mo ina massa temp ed energia, dentant che determinescha cumplettamain il gir da la vita da Ladina.
In onn intensiv betg mo en tschertga d'in nov gnirunchel
Malgrà tut las difficultads en la vita, capitular n’è mai stà in’opziun per Ladina. Uschia ha ella persequità cun gronda perseveranza trasora in grond giavisch. Survegnir in nov gnirunchel e pudair ir cun quel finalmain per la prima giada insumma a chatscha da capricorns.
Ils «Cuntrasts» cun in’istorgia che va en il vair senn dal pled sut la pel e che raquinta in onn intensiv da Ladina en sia tschertga betg mo d’in nov gnirunchel.
