Siglir tar il cuntegn

Header

video
Meztga da chasa a Schlans
Or da Cuntrasts dals 09.01.2022.
laschar ir. Durada: 25 minutas 40 Secundas.
cuntegn

Cuntrasts Meztga da chasa

Ils Pfisters da Schlans èn l’unica famiglia en Surselva che fa anc meztga da chasa à la veglia. Ils sis fragliuns mainan enavant quai ch’els han vis ed emprendì da lur geniturs. Antruras mazzava lur bab, ils agens portgs e quels dals vischins. Uss fa Silvio Pfister, il frar giuven, quella lavur.

Sch’ins prenda la vita ad in animal datti era muments ch’ins ha nauscha conscienza. Ins na sa senta insumma betg bain.
Autur: Silvio Pfister Pur e mazler
purtret dal portg mazzà ed il pur che tegna ils mauns suravi ed engrazia.
Legenda: Suenter ch’il portg è mort e stgannà di Silvio Pfister «engrazia» al portg. RTR

Sper sia tratga da chavals ha Silvio Pfister era anc trais portgs. Mintg’onn la fin da november vegnan dus dad quels mazzads. Per quest di da meztga sa radunan tut ils sis fragliuns. Las lavurs èn repartidas tenor preferenza e savair. Silvio, sper pur er anc mazler da professiun, el mazza il portg. Ils dus frars e la sora giuvna sa gidan, entant che tschellas duas soras preparan il gentar e la tschaina per tuts, per gronds e pitschens.

Il portg nair da las Alps
Legenda: Il portg nair da las Alps RTR

Ils portgs da Silvio Pfister èn portgs dal raz portg nair da las Alps. In raz ch'è vegnì reintroducì ils davos onns. Tar Silvio Pfister vegn il portg betg chatschà al lieu da meztga, mabain carmalà natiers. Ins n'auda betg in soli sbratg u sgrign dal portg. Tuts spetgan enfin che l'animal vegn ord libra voluntad en il lieu da ses destin.

Silvio Pfister e ses fragliuns spetgan enfin ch’il portg vegn ord libra voluntad.
Legenda: Silvio Pfister e ses fragliuns spetgan enfin ch’il portg vegn ord libra voluntad. RTR
Pazienza è il meglier ch’ins po avair en quests muments.
Autur: Silvio Pfister Pur e mazler

Per mazzar ses agens portgs na dovra Silvio Pfister nagina lubientscha, el sto dentant sa tegnair vid duas premissas. Ina giada sto el suandar la lescha che protegia l’animal. La lescha pretenda ina savida cumpetenta da la persuna che mazza e che l'animal vegnia mazzà senza ch’el haja da patir. La segunda premissa per la meztga da chasa: La charn na dastga betg vegnir vendida, ella è mo per l’agen diever.

Suentermezdi vegn la tocca da charn elavurada.
Legenda: Suentermezdi vegn la tocca da charn elavurada. RTR
Jau hai chapientscha che blera glieud na maglia betg charn. Per part vegnan quests animals tegnids miserabel e mazzads en grondas mazlarias ch’ins na dastga propi betg guardar. Jau di adina: Ins sto esser endretg cun ils animals cura ch’els vivan ed lura dastgan ins era magliar els cun buna conscienza.
Autur: Silvio Pfister Pur e mazler

Silvio Pfister elavura tut la charn dal portg. Las ischettas, ils schambuns e las spatlas vegnan ensaladas e setgentadas. Er en la salamuira vegn la lieunga e suenter cuschinada en la schuppa. Cun la tocca da charn manidla ed il grass vegn fatg liongias da coier e liongias nairas. Dals organs vegn sulettamain il pulmun betg duvrà. Il gnirom datti da gentar il di da meztga.

Las soras Marionna e Martina Pfister preparan il gentar.
Legenda: Las soras Marionna e Martina Pfister preparan il gentar. RTR
Tagliar il gnirom hai jau emprendì da mes bab. I na dastga betg esser memia gross ed ins sto tagliar davent las tarscholas e las palletschas.
Autur: Marionna Pfister

La saira sa radunan anc ina giada tut ils gidanters e gidantras en stiva. Questa giada per festivar la meztga bain gartegiada. Il past festiv è fratem dal portg gist mazzà.

La saira per pign e grond ina festa.
Legenda: La saira datti per pign e grond ina festa. RTR
Nus celebrain tut quels sentiments, quella pressiun il di ora. La saira vegnan ins deliberà. Quai dat buns sentiments da cuminanza.
Autur: Silvio Pfister Pur e mazler

RTR Cuntrasts 17:40

Artitgels legids il pli savens