L’emprim da zercladur 2016 vegn Pirmina Caminada elegida sco emprima dunna en il ravugl dals guardiaselvaschina dal chantun Grischun. In mument istoric en l’istorgia da la chatscha grischuna. Per Pirmina Caminada va in siemi en vigur, sia passiun daventa sia professiun.
Guardiaselvaschina na fas ti betg senza motiv. Quai è ina clamada che ti na fas betg mo sco lavur, quai è propi in pensum ch’ins vul e tschertga.
Suenter 25 onns esser chatschadra munta quai dentant era ch’ella na po betg pli ir sezza a chatscha. En contact cun la selvaschina è ella dentant pli che mai. Durant l’onn surveglia ella ils territoris da protecziun, il temp da chatscha controllescha e documentescha ella ils animals sajettads da ses anteriurs collegas.
Pirmina Caminada ha duas figlias. Angela, la giuvna, ha iertà la passiun da sia mamma. Gia da pitschna ha Angela accumpagnà sia mamma a chatscha ed uschia pudì emprender e profitar da la profunda savida da sia mamma. Uss èsi viceversa. La figlia ha sezza la patenta da chatscha e la mamma accumpogna la figlia. Per omaduas è la chatscha communabla ina funtauna d’energia: La vita spartanica en tegia, suandar durant plirs dis il ritmus da la natira – quai maina ellas ad in profund equiliber intern.
Sche jau observ in chamutsch ni in tschierv, lura ves jau adina era il caracter.
Pirmina Caminada è creschida si en ina famiglia purila a Ligiazun, in aclaun dadens Vrin. Tras sia famiglia ha ella da pitschna ensi pudì emprender bler dals animals, las ervas e la cultura da sia val. Oz è ella ornitologa, experta d’examens da chatscha, experta dad ervas ed autura dal cudesch «Orte der Magie» che descriva lieus da cult, forza e cura en la Val Lumnezia. Sper la lavur da guardiaselvaschina è ella parzialmain era rangera en la Ruinaulta.