Fotografias ed auters documents raquintan da las vitas dal passà. Mo adina dovri era glieud che rimna ed archivescha quests documents. Il film «Segns dal temp – archivar per mussar» accumpogna persunas che rimnan ed archiveschan documents vegls e cun els era las istorgias dal passà.
Uschia mussa il film per exempel era l’istorgia da l’internà polac ch'ha documentà cun passa 3'000 fotografias sia odissea tras la Segunda Guerra mundiala e silsuenter la vita en ils champs d’internament en il Grischun. Ma il film da l’autur da film Casper Nicca mussa era co che quests documents che furman nossa istorgia vegnan elavurads en ils archivs e co ch’els vegnan fatgs accessibels a las proximas generaziuns cun las pli novas tecnologias d’intelligenza artifiziala.
