Avant 8 onns è Luzia Lutz svanida. Suenter far cumissiuns en in center da cumpras ensemen cun ses um, ha ella ditg ch'ella mondia sin tualetta, ed è mai pli turnada. Tut las retschertgas da la famiglia e da la polizia n'han purtà nagut.
Fin oz resta la famiglia enavos cun las regurdientschas vi da lur mamma e dunna. La preistorgia da Luzia Lutz raquinta d'in destin tragic e d'in lung cumbat cunter problems psichics.
Nus essan vegnids sper il Rain ed essan ids sin la via da peduns sper la riva ora, avain tschertgà dapertut. Jau hai adina gì quest sentiment che Luzia pudess forsa esser insanua. Nus avain tschertgà e tschertgà – e tuttina chattà nagut.
Er sche tut las differentas retschertgas inditgeschan e laschan sminar che la dunna da 58 onns ha probabel fatg suicidi ils 4 d’october 2014, resta fin oz l’intschertezza. Tge è propi capità?
Il film dals Cuntrasts mussa l'istorgia da la spariziun da Luzia Lutz ed er l'impussanza da la famiglia che resta enavos.