Cun trais stailas da Michelin e 19 puncts da GaultMillau tutga Andreas Caminada en la Tumleastga tar ils megliers. Ma en cuschina è el pauc. Sche, lura oravant tut per lavurar vid novas creaziuns. Uschiglio è el manager ed ha tut ils fils enta maun. Tar ses imperi tutgan trais ustarias, ina pasternaria, dus hotels. En tut lavuran var 70 persunas en il Chasti Schauenstein a Farschno.
Segir hai dà muments critics ch'jau hai pers pais, ch'jau hai lavurà memia bler.
Dario Cadonau ha ina staila e 17 puncts. L'Engiadinais ha gugent tut sut controlla. El è da la damaun enfin la saira al lieu e sch'i fa basegn, porta el er las valischs dals osps. Liber fan el e sia famiglia mo duas giadas l'onn. Il nivel ch'el e sia dunna han cuntanschì cun lur ustaria e hotel In Lain a Brail, vulan els mantegnair. Quai pretenda unfrendas. En lur cas: Pauc u strusch temp liber.
Per il mument è la sanadad buna. Uschè ditg ch'i va, vai. Sch'i sa mida, lura sa mini. Jau ves lura en 10 onns co ch'igl è.
In onn suenter che Flurina e Michael Häsch-Maissen han surpiglià l'ustaria Stiva Grischuna da lur genitrus, han els survegnì 13 puncts. Quels han chaschunà sentiments maschadads tar ils gastronoms da Mustér. Avant che surpigliar l'ustaria han omadus lavurà divers onns en las meglras ustarias da gourmet. Gist perquai ch'els enconuschan il stress e l'engaschament ch'in tal manaschi pretenda, èn els sa decidids per la cuschina burgaisa e betg per quella da gourmet. Per avair temp per els e lur uffant serran els sappientivamain lur manaschi dus dis ad emna.
Magari ha'jau tema per nossa relaziun. Là essan mintgatant al limit. I ha er gia dà notgs che nus essan ids senza tschantschar en letg.