Per ureglias dad oz tuni bunamain aventurus: In Saurer dal tip 45 PS, in anteriur camiun dal militar che pudeva transportar 16 persunas. Cun in tal vehichel, ch'era dentant 3 giadas pli spert che las charrotschas, ha la posta transportà l'emprima giada passagiers sin ina lingia en Grischun. La premiera dals 15 da zercladur 1919 ha gì lieu sin il traject da Reichenau si Flem ed ha cuzzà 50 minutas. Ed il viadi è stà il start per ina veritabla istorgia da success.
Premiera amez il boom turistic
Per Flem, dal 1919 gia ina vischnanca turistica enconuschenta, è l'introducziun dals automobils da posta stada in grond gudogn. Bain encletg, enfin dal 1925 era en vigur en il chantun Grischun anc adina in scumond general per tut il traffic motorisà, damai per tut ils autos. E l'istorgia da success ha cuntinuà durant ils davos 100 onns enfin al di dad oz. Oz è la rait da lingias d'auto da posta en il Grischun var 1700 km lunga, ed ils cars mellens transportan onn per onn radund 11 milliuns passagiers.
Ina famiglia da manischunzs
Ina famiglia che resplenda bain il gir da l'istorgia è quella dals Bischoff-Gaudenz - ina famiglia che vegn preschentada en il film «Tranter festa e tempesta» dals Cuntrasts. Sur tschintg generaziuns ha la famiglia Bischoff-Gaudenz gì viturins e pli tard chauffeurs da posta. Durant las emprimas quatter generaziuns han els procurà per il servetsch postal en la Val S-charl. Oz è Andrea Gaudenz, il davos da la «dinastia» Bischoff-Gaudenz, impressari d'autos da posta en la Val Schons, cun passa 10 emploiads e 5 bus.
Il scandal curt avant il giubileum
Tutta armonia e tut l'istorgia da success dals autos da posta è però vegnida disturbada ils davos mais dal scandal da subvenziuns. Durant onns ha l'interpresa AutoDaPosta zuppentà en Svizra illegalmain gudogns, ed ha incassà tuttina autas subvenziuns dal maun public. Il chantun Grischun è stà pertutgà ordvart ferm da quests embrugls. E gist perquai ha l'euforia dal giubileum da 100 onns autos da posta en il Grischun survegnì ina brava duscha fraida.
Il film «Tranter festa e tempesta» da l'emissiun Cuntrasts sa fatschenta cun l’istorgia dals davos 100 onns dals autos da posta en il Grischun, in’istorgia da success che vegn turblada dals embrugls cun subvenziuns dals davos onns.
TR Cuntrasts 17:25