«Samuel Bischof da Mustér disch d’inrar da na.» – «Tinet Michael da Valchava es cuntschaint sco ‘Tinet il resgiader’.» – «Nicole Bundi viva là, ingio ch’oters fan vacanzas.» – Cun talas frasas han cumenzà ils set purtrets filmics da «4x4» realisads durant il davos onn. En mintga stagiun ha la redacziun da Cuntrasts preschentà mintgamai quatter persunas rumantschas. Perquai il num: 4x4.
Da Valchava enfin Mallorca
Las equipas da film dals Cuntrasts han visità e filmà ils protagonists als lieus ils pli divers, da Vrin enfin Valchava, da Basilea enfin Mallorca. Cun gronda avertadad han tuttas 16 persunas permess invistas en lur mintgadis. Petra Rothmund, la redactura responsabla da la seria, è stada impressiunada: «Las persunas purtretadas ans han propi laschà participar a lur vita, a lur mintgadi. Ina giada ha la crew da film perfin pudì entrar la damaun en l’abitaziun durant ch’il protagonist durmiva anc. E nus udivan co el sgruflava! Quella proximitad e quella fidanza m’ha propi commovì.»
Ina revue per la fin da l’onn
La seria «4x4» ha procurà per buns resuns e diversas reacziuns. E perquai mussa Cuntrasts ils 30 da december anc ina giada las ivettas da quels 16 purtrets – e quai en ina versiun da 50 minutas. Per uschedir il grond final da «4x4» cun tut las persunas purtretadas, cun Samuel Bischof da Mustér, Ottilia Godly da Brail, Dario Cantieni da Donat, Fatima Tschenett da Wangs, Tinet Michael da Valchava, Madlaina Capeder Sonder da Salouf, Serafin Caviezel da Vrin, Eva Camenisch da Basilea, Aita Largiadèr da Sta. Maria, Werner Bühler da Savognin, Andrea Pinösch da Sent, Nicole Bundi da Mallorca, Margrit Tiefenthal da Casti, Christof Loher da Trin, Emma Gabriel da Vrin e Beat Padrun da Samedan.
4x4 – la revue da tut ils 16 purtrets:
30-12-2018, a las 17.05 sin SRF1 ubain sin www.rtr.ch.