Siglir tar il cuntegn

Header

video
Alexi e Marcus – 35 onns en dus
Or da Cuntrasts dals 08.04.2019.
laschar ir. Durada: 25 minutas 23 Secundas.
cuntegn

Cuntrasts Alexi e Marcus – 35 onns en dus

En la scena da la musica rumantscha datti in duo da chantauturs che giauda ina popularitad sco be paucs: Alexi Nay e Marcus Hobi. Dapi 35 onns fan els musica ensemen. L'emissiun Cuntrasts ha realisà in film davart questa amicizia musicala ch'è unica en il mund rumantsch.

Alexi Nay e Marcus Hobi han creà en il decurs dals davos decennis veritabels semperverds. Chanzuns sco «Il clom dalla Greina», «Quei dat ei buc tier nus», «Surselva» e bleras autras fan bunamain gia part da la ierta culturala rumantscha. Ed il duo chanta anc adina, quest atun publitgeschan els dus lur tschintgavel album.

audio
Mezdi: Avis Cuntrasts «Alexi e Marcus – 35 onns en dus»
ord Actualitad dals 11.04.2019.
laschar ir. Durada: 7 minutas 29 Secundas.

Students e chantauturs

Alexi Nay e Marcus Hobi emprendan d’enconuscher in l’auter a la recruta nua ch’els èn en la medema cumpagnia. Alexi Nay da Zignau aveva gist finì il seminari da scolasts. Suenter la recruta dat el scola in onn e va suenter a Friburg per studegiar scolast secundar. Marcus Hobi da Mels ha fatg la matura a Mustér ed emprendì là rumantsch. El va per in onn a Paris e silsuenter medemamain a Friburg.

A Friburg è uschia l’entschatta dals onns 80 l’entschatta d’Alexi e Marcus. En lur abitaziun da students chantan, scrivan e cumponan ils dus giuvenots atgnas chanzuns. Bainbaud dumbra lur repertori 16 chanzuns. L’onn 1984 cumpara lur emprima platta: «Ina canzun».

Duas vuschs, ina ghitarra, ina flauta

Lur represchentaziun è simpla: duas vuschs, ina ghitarra, ina flauta e forsa in tamburin. Alexi e Marcus dattan quels onns 80 concerts dapertut. Els chantan per emissiuns da la televisiun, fan registraziuns per il radio e daventan dus chantauturs populars en la Rumantschia.

Enconuschents sur la Rumantschia

1985 scrivan els la chanzun «Il clom dalla Greina», ina decleraziun d'amur per questa cuntrada e per preservar la planira da la Greina dad in lai artifizial. Questa chanzun fa enconuschent ils dus chantauturs era sur la Rumantschia ora. L’onn 1986 cumpara lur segunda platta «In clom». Gliez onn survegnan els il pitschen Prix Walo. Be quatter onns pli tard publitgeschan els il terz album «Anavon».

Lur chanzuns tanschan davent d’ina chanzun populara vi tar ina descripziun da la natira, dad ina chanzun da protest enfin tar ina chanzun d’amur. L'onn 1990 vegnan Alexi e Marcus undrads cun il premi da cultura «Pader Flurin Maissen» ed in onn pli tard survegnan els il premi da promoziun dal chantun Grischun.

Nus vein mai calau.
Autur: Alexi Nay chantautur

Suenter ils onns 90 èsi pli ruassaivel enturn Alexi e Marcus. Omadus han famiglia e lavuran. Marcus Hobi è scolast secundar e viva a Vilters. Alexi Nay stat a Vella ed è inspectur da scola. Mintgatant dattan els in concert, plitost en in ravugl pli pitschen. Era sch’els na concerteschan betg pli uschè savens, chalà n’han Alexi e Marcus mai.

L’onn 2008, quasi 20 onns suenter il terz disc, cumpara «Salischina». En quella producziun collavuran Alexi e Marcus cun differents auters musicists.

«Alexi e Marcus – 35 onns en dus»

video
Pertge han Alexi e Marcus anc suenter 35 onns success?
Or da RTR dals 10.04.2019.
laschar ir. Durada: 3 minutas 49 Secundas.

Alexi e Marcus èn dapi 35 onns ensemen sin viadi musical. Quest‘atun cumpara lur tschintgavel disc. Ina buna chaschun per purtretar il duo en in film documentar cun il titel «Alexi e Marcus – 35 onns en dus». En ina tura sur la Greina reflecteschan ils dus chantauturs lur istorgia ed els raquintan da lur messadis, plaschairs e reacziuns. «Alexi e Marcus – 35 onns en dus» è in film davart ina amicizia musicala singulara en la Rumantschia.

video
Alexi e Marcus – dapi 35 onns in success
Or da Telesguard dals 12.04.2019.
laschar ir. Durada: 4 minutas 54 Secundas.

Il film «Alexi e Marcus – 35 onns en dus» da l'emissiun Cuntrasts mussa l'amicizia e la carriera musicala dad Alexi Nay e Marcus Hobi – dumengia, ils 14 d'avrigl 2019, a las 17.25 sin SRF1.

TR Cuntrasts 17:25

Ord l'archiv

audio
Alexi e Marcus – nossas istorgias han commovì els!
ord Marella dals 28.10.2018. Maletg: RTR / MAD
laschar ir. Durada: 56 minutas 55 Secundas.

Artitgels legids il pli savens