Sco sch'i na fiss gia grev avunda da stuair prender cumià dad ina chara persuna, renda il coronavirus la situaziun anc pli difficila: Pervi da la situaziun greva na dastga quai dar actualmain nagins funerals sco usità – er tar persunas, che na moran betg da la malsogna Covid-19.
«Naginas brancladas, gnanc en famiglia»
Ensemen cun sia dunna ed ils uffants ha Ramun Venzin stuì prender cumià da sia mamma. Ella è morta ils 12 da mars e n'ha betg pli pudì vegnir sepulida en in funeral usità. Ella avess segir gì gust dad ina baselgia bain plaina, raquinta Ramun Venzin.
Las emoziuns èn qua independent da la grondezza dal funeral, ellas pon però vegnir vividas be sin distanza. Questa distanza saja grev da supportar:
Naginas brancladas, gnanc en famiglia.
Uschia fa corona che las cartas da led a la famiglia cuntegnan sper las condolaziuns er la cumpassiun da stuair viver la perdita da la mamma en circumstanzas, che rendan il cumià anc pli grev da supportar.
Consolar ed accumpagnar en temps da corona
Funerals han lieu be pli en famiglia. Messas vegnan stritgadas, nozzas e battaisems spustads – ina massa da rituals, che furman uschiglio la vita, na dastgan betg vegnir fatgs il mument.
Central en quels muments èn ils spirituals e las spiritualas sco Chatrina Gaudenz. Ella è ravarendessa al Neumünster a Turitg ed accumpogna las vitas da blera glieud cun exact quests rituals uschè impurtants.