Siglir tar il cuntegn

Header

video
La crusch cun l’amur – Marcel Köhle raquinta da ses dilemma tranter altar ed amur
Or da Cuntrasts dals 28.11.2019.
laschar ir. Durada: 25 minutas 21 Secundas.
cuntegn

Consequenzas dal celibat La crusch cun l’amur

Decider tranter l’altar e l’amur – per l’emprima giada discurra l'anteriur plevon da Breil, Marcel Köhle, da ses dilemma e sia decisiun per l'amur.

Ils 15 da fanadur 2018 suenter la messa da perdunanza a Dardin annunzia (il plevon) sur Marcel Köhle sia demissiun. El haja emprendì d’enconuscher ina dunna e na veglia betg pli zuppentar questa relaziun. Ils parochians e las parochianas èn schoccads e consternads – nagin n’ha sminà nagut.

Suenter la messa, cura ch’el ha communitgà sia demissiun eri parochians e parochianas che bragivan.
Autur: Sep Cathomas president da la plaiv

En l’entira Svizra rapporta la pressa dal plevon da Breil ch’ha chattà sia amur. Il celibat, la lescha ch’oblighescha il plevon da viver sulet e betg maridà vegn ina giada dapli crititgada e messa en dumonda. Sora Florentina Camartin da Breil daventa activa e rimna suttascripziuns per ina petiziun che pretenda la liberalisaziun dal celibat.

video
Florentina Camartin lantscha petiziun cunter il celibat
Or da Telesguard dals 13.03.2019.
laschar ir. Durada: 2 minutas 18 Secundas.

En la plaiv era il plevon Marcel Köhle (1983), oriund da Domat fitg stimà ed apprezià da giuven e vegl. La glieud era loscha da lur giuven augsegner rumantsch ch’era dapi trais onns lur augsegner.

Marcel Köhle en baselgia.
Legenda: Marcel Köhle en baselgia. MAD

Suenter sia ordinaziun il 2011 è sur Marcel Köhle durant quatter onns vicari a Witikon/Turitg. Durant occurrenzas da la plaiv emprenda el d’enconuscher sia partenaria. A l’entschatta è il contact mo sporadic, ma cun il temp creschan ils sentiments in per l’auter.

Insaco n'hai jau betg vulì acceptar quests sentiments. Quai na dastga gea betg esser!
Autur: Marcel Köhle

Amez quest temp da tensiun vegn la dumonda da la plaiv da Breil. Per Marcel Köhle gist in bun mument da midar plazza, terminar la relaziun cun sia partenaria e cumenzar da nov. Suenter quatter mais s’annunzia la partenaria puspè, la relaziun entschaiva da nov ed uss pir da dretg. La partenaria vegn a star en il Partenz e Marcel Köhle visita ella regularmain.

Stuair zuppar questa relaziun, quai dat in sentiment en il cor, sco sch’i stgarpass.
Autur: Marcel Köhle
video
«È quai uman da stuair decider tranter duas bunas chaussas?»
Or da RTR dals 28.11.2019.
laschar ir. Durada: 23 Secundas.

I suondan grevs temps en il zuppà enfin ch’els decidan ch’el vegnia a demissiunar sco plevon. Els tschentan a sasez in ultimatum: stad 2018. Per la partenaria èsi cler, vegn quest termin betg tegnì en, alura è ella davent.

Ils davos mais èn stads ils pli grevs. Prender cumià pass per pass.
Autur: Marcel Köhle
video
Reacziun da l'uvestg
Or da RTR dals 28.11.2019.
laschar ir. Durada: 40 Secundas.

Gist suenter la demissiun sa retira Marcel Köhle da la publicitad. Dumondas per intervistas refusescha el.

Marcel Köhle e sia partenaria maun en maun.
Legenda: Marcel Köhle e sia partenaria maun en maun. RTR
video
«Sco cristian èsi in duair d'esser sincer envers ils auters.»
Or da RTR dals 28.11.2019.
laschar ir. Durada: 53 Secundas.

Els van ad abitar a Saas en il Partenz e Marcel Köhle entschaiva a studegiar a la Scola auta da pedagogia a Cuira. El vul daventar scolast.

video
«Igl esser pastur, esser qua per la glieud, manca.»
Or da RTR dals 28.11.2019.
laschar ir. Durada: 31 Secundas.

RTR Cuntrasts 17:40

Artitgels legids il pli savens