Siglir tar il cuntegn

Header

video
Noss exots
Or da Cuntrasts dals 18.04.2021.
laschar ir
cuntegn

Cuntrasts Noss exots

En ses film «Noss exots» preschenta la cineasta Menga Huonder-Jenny tschintg spezias exoticas e lur possessurs e possessuras. Duas dumondas interesseschan la cineasta: Pertge han ils possessurs e las possessuras elegì gist quest animal e tge vul quai dir, tegnair in animal da niz exotic?

En ina societad cun adina dapli inscunters e convivenza d’umans da differentas culturas n’èsi betg surprendent ch’er il mund dals animals daventa adina pli divers e multifar. La variaziun dad animals exotics en Grischun è creschida considerablamain ils davos 15 onns. Actualmain datti en Grischun 6 sorts dad animals da niz exotics: yaks, struts, quacras, lamas, alpacas e chamels. Schebain che chamels n'èn betg en il stretg senn dal pled animals da niz, mabain plitost animals da hobi.

Quai vegnin nus savens dumandà, quels paupers chamels en la naiv.
Autur: Angelika Bandliha chamels en Stussavgia
Angelika Bandli cun in da ses chamels.
Legenda: Angelika Bandli cun in da ses chamels. Menga Huonder-Jenny

Cumenzà ha l'immigraziun dad animals da niz «esters» avant var 50 onns e quai cun la vatga. Enfin ils onns 60 devi mo la vatga brina en Grischun. Cun las emprimas vatgas mamma ils onns 70 èn era novas razzas arrivadas sin pastgiras grischunas. Oz datti en Grischun passa 30 differentas razzas da vatgas. Ina da quellas èn ils yaks da Christina Mani ad Andeer.

Ils megliers tocs charn dals yaks èn memia chars, perquai magliain nus quels. Far liongias fiss donn.
Autur: Christian Maniha Yaks ad Andeer
Yaks ad Andeer.
Legenda: Yaks ad Andeer. Menga Huonder-Jenny

Il 2020 ha la famiglia Cantieni da Donat mess tiers alpacas. Avant da survegnir la lubientscha ha l'uffizi veterinar controllà, schebain las saivs sajan avunda autas, sch’els hajan in endretg suttetg ed avunda meters quadrats per sa mover libramain.

Els èn simplamain bler pli sensibels pari a mai.
Autur: Brida Cantieniha alpacas a Donat
Christine e Brida Cantineni cun lur alpacas.
Legenda: Christine e Brida Cantineni cun lur alpacas. Menga Huonder-Jenny

Ils ovs da las quacras giapunaisas valan sco delicatessa. Imelda Schmid venda ils ovs da sias quacras a persunas privatas, a diversas butias sco il Volg da S-chanf, ma era als gronds hotels en Engiadin'Ota.

Il spezial è che mintga quacra giapunaisa fa ovs cun ses agen muster.
Autur: Imelda Schmidha quacras giapunaisas a S-chanf
Ovs da quacras giapunaisas.
Legenda: Ovs da quacras giapunaisas. Menga Huonder-Jenny

Ils struts èn ils pli gronds utschels ch’existan sin il mund, ils mastgels paisan passa 100kg, da chasa èn els en il sid da la Sahara. En Grischun datti mo duas tratgas da struts. Ina a S-chanf e la segunda è quella da Laura Bugada a Lostallo. Ella ha in tgiet e quatter giaglinas.

In ov da strut po pasar enfin 2kg, normalmain vegn in daquels dentant 1,5 enfin 1,6kg.
Autur: Laura Bugadaha struts a Lostallo
Struts a Lostallo.
Legenda: Struts a Lostallo. Menga Huonder-Jenny

Menga Huonder-Jenny

Avrir la boxSerrar la box

La reschissura e cineasta Menga Huonder-Jenny è creschida si ad Andeer. Suenter la matura d’economia a la Scola chantunala grischuna ha ella fatg il diplom d’actura a la Universität für Musik und darstellende Kunst a Graz en l’Austria. Dal 1992 enfin il 1997 ha ella studegià a la Deutsche Film- und Fernseh-Akadamie Berlin DFFB. Menga Huonder-Jenny è maridada, ha dus figls e viva da manaivel da Berlin.

Il film «Noss exots» è ses 8avel film ch’ella realisescha sco autura libra per la Televisiun Rumantscha.

RTR Cuntrasts 17:25

Artitgels legids il pli savens

Scrollar a sanestra Scrollar a dretga