A Nanjing, ina citad dad 8,3 milliuns abitants, han quatter datatipistas scrit giu las 8500 paginas dal DRG. 19 mais han ellas duvrà. Tut han ellas scrit giu duas giadas per pudair cumparegliar las duas versiuns ed evitar sbagls.
Ins s'imagina gia che quellas scrivan spert e fitg exact. Ma da vesair, cun tge tempo – quai è propi surprendent ed in pitschen miracul.
Contact cun la China via la Germania
Il contact cun la China è sa dà tras il «Trier Center for Digital Humanities», in center spezialisà per digitalisar scienzas umanas da chasa. Il center a Trier (Germania) ha ils contacts cun la China dapi 20 onns. Sco emprim'ovra eran vegnids digitalisads ils 32 toms dal grond vocabulari tudestg dals frars Grimm.
Sch’i din che las cundiziuns sajan en urden, fidain nus a quella glieud.
Tras la scrittira chinaisa han las dunnas chinaisas in egl bler pli scolà per las differenzas da tut las sorts segns ed accents spezials. Er èsi cumprovà ch’ins fa damain sbagls cun scriver giu ina lingua ch’ins na chapescha betg.
Digitalisaziun «made in China» pli favuraivla
La raschun decisiva per dar la lavur en la China èn dentant stads ils custs: Quels èn in bun toc pli bass en la China che qua tar nus. Tuttina èn las cundiziuns da lavur per las datatipistas meglras ch'en la media chinaisa: Las datatipistas lavuran 8 uras a di. Lur paja è sur la paja minimala prescritta da la lescha. Quai saja ina buna paja per ina persuna senza scolaziun specifica.
La saira pudain nus smetter ad uras, e nus avain nagin squitsch. Uschia poss jau ir a chasa e guardar da mia figlia.
Cun sia paja e quella da ses um po la famiglia da Xinhau Ge sa prestar ina abitaziun da trais stanzas. Quai è bler spazi per las relaziuns en la China.
Cuntrasts 17:25