Igl è stà in onn da las midadas quest 2019. In onn ch’i renda da prender sut la marella en la retrospectiva: Igl è stà il onn da l’unda verda, da las demonstraziuns per il clima, da las demonstraziuns per dapli democrazia a Hongkong. I para che tut è en moviment.
Quai vala era per il Grischun: Il luf è turnà. Ed il 2019 ha mussà ch'el è s’etablì ed è vegnì per restar. Il Focus mussa, co che noss redactur Casper Nicca, che ha fatg in film dals Cuntrasts davart il luf, ha recepì quest onn dal luf.
Susch sa mida. Dad ina vischnanca che aveva tema ch'i vegnia stgir è Susch s'avanzà ad ina metropola d’art, grazia al Muzeum Susch – ma tge munta quai per ils abitants ed il futur da Susch?
E la Val Medel: ella perda abitants, para da murir or, ma quai è mo la mesa vardad. I dat era blers projects innovativs e glieud che vul star e restar en Val Medel.
Il Focus cun revistas ed invistas dal psicoterapeut e teolog Arno Arquint.
RTR Focus