Il film «I va ensi – il boom da mountainbike en il Grischun» prenda sut la marella trais regiuns grischunas. Ellas èn en differentas situaziuns quai che pertutga il svilup dal turissem da mountainbike.
Lai – l’exempel da parada
A Lai è il mountainbike gia dapi il 2009 ina fitg ferma pitga en la strategia da turissem. Igl è ina da las paucas destinaziuns en il Grischun che ha in parc mo per mountainbikers. Ils ultims 10 onns è il dumber da visitaders creschì per bunamain il dubel. Tuttina na fan las pendicularas betg fatschenta cun ils bikers. Quels che profiteschan èn ils hotels, la gastronomia e las fatschentas da sport. Betg uschè intgantads da quest boom èn las viandantas ed ils viandants.
Il Surses vul era profitar dal boom
Puncto turissem da mountainbike è il Surses anc pir a l’entschatta. Las sendas n’èn anc betg colliadas dapertut e la signalisaziun è per part manglusa. La destinaziun vul midar quai ed ha organisà l’avrigl in workshop cun tut ils pertutgads. Per guardar tgeninas ideas che pon vegnir realisadas han Darco Cazin e ses team che sviluppescha destinaziuns fatg ina tura tras la regiun.
L’Engiadina Bassa ha gronds plans
La destinaziun Engiadina Samignun Val Müstair tutga gia ditg tar las grondas regiuns da mountainbike en il Grischun. In concept co colliar meglier las valladas dat quai dentant pir dapi il 2018. Passa 400 kilometers sendas duain vegnir meglieradas. Construids da nov vegnan 30 kilometers. Il project custa 6 milliuns francs e vegn finanzià da las tschintg vischnancas. Per pudair realisar il project han ils lavurers da vischnanca e da las pendicularas fatg questa stad in curs da construir sendas.
TR Cuntrasts 17:25