Sche Peter Haas discurriva da ses emprim film da dissegns animads pli lung, lura fascheva el quai cun luschezza. Ed el fascheva quai cun duvrar pleds sco «mes highlight» o «mia meglra lavur». Manegià è natiralmain il film «Il salip e la furmicla», preschentà cun grond success en il Kino Rex a Cuira il 22 da november 1979 suenter prest 3 onns lavur intensiva. Quest film da dissegns animads cun la musica da Gion Antoni Derungs è segiramain l'ovra che resta il meglier en regurdanza tar la Rumantschia.
Cun corp ed olma dissegnader
Peter Haas era dentant in artist bler pli multifar. Ses siemi fiss stà da pudair frequentar la scola d'art, ma questa furmaziun n'era per ses geniturs betg pussaivla da finanziar, uschia che Haas ha emprendì il dissegnar tut sco autodidact. El ha fatg l'emprim in‘emprendissadi sco laborant e cuntinuà a lavurar tar la Ovras da Domat. Pir il 1979 ha el avert ses agen atelier. Sco cartoonist è Peter Haas dentant vegnì enconuschent gia pli baud. Il 1961 è l'emprima caricatura da Haas cumparida en il «Nebelspalter», quella giada la gronda gasetta satirica en Svizra. Cun il dissegn sin l'emprima pagina dal Nebelspalter ils 5 d’avust 1964 ha Haas fatg definitivamain strada sco caricaturist da muntada svizra. Ses amis Hendri Spescha e Tista Murk han motivà Peter Haas da realisar il 1967 era emprimas istorgias dissegnadas per la Televisiun Rumantscha, numnadas quella giada anc «intermezzos da Peter Haas» respectivamain «Humor cun Haas». L‘emprima ovra pli gronda per la Televisiun Rumantscha è stada a Nadal 1967 l'illustraziun da la «Legenda da Nadal», scritta e raquintada da Tista Murk. Era la Televisiun DRS ha scuvert Peter Haas ed ha incumbensà el da far emprims films da dissegns animads. Dentant ha realisà Haas er ord atgna iniziativa films sco «Valentins Mondreise» (1970), «Nach der Natur» (1971), «Die Nummer» (1972), «Das Duell» (1972) e «Tango» (1974).
Il siemi d'in agen studio da film a Domat
La pussaivladad da realisar films da dissegns animads ha avert per Peter Haas novas perspectivas sper sias grondas activitads sco cartoonist per differentas gasettas. L'onn 1985, cura ch'el era gia dissegnader e cartoonist da professiun cun agen atelier, ha survegnì l'artist da Domat er sia emprima distincziun da la Confederaziun per ses film «Invasion vom Planeten Kar», in film per la profilaxa da dents ch’el ha realisà per incumbensa da l’industria farmaceutica. Quest film è vegnì schizunt mussà il 1997 al Festival da film a Locarno en ina retrospectiva da films cun dissegns animads. In auter film da quest tip era pront per vegnir realisà: il libret, il plan da finanziaziun e perfin il contract era sin maisa e suttascrit. «Zacharias Zack» fiss stà ina seria prevesida surtut per il martgà englais. La firma da Londra ha dentant fatg concurs e Peter Haas ha stuì emblidar ses siemi da realisar in agen studio per films da dissegns animads a Domat. Restà è mo in film da promoziun cun l'emprima aventura dal detectiv privat Zacharias Zack sin la tschertga dals rubins cotschens engulads a Hamburg.
Ils comics da la marca Haas
Furora han fatg Peter Haas e Felix Giger cun lur «Istorgia dals Rumantschs». Quella ha chaschunà discussiuns animadas. Els han prendì la critica da l'emprim tom (Il pajais da Tukinu, Arusa & Eluku, 1987) cun umor e tematisà quella en il segund cudesch (Ils cots da Mercur, 1990) e gist er integrà la criticra e directura dal Museum Retic sco nova figura en lur istorgia dals Rumantschs. Ulteriurs comics ha realisà Haas il 2000 cun «He Gilbert!» ed il 2007 cun l'istorgia dals dus seniors «Herby e Fred».
Haas era daventà dentant er en il sectur da la publicitad in'adressa enconuschenta. Uschia ha el sviluppà per exempel en connex cun il littering la figura dal «Sammli». Questa figura dat tips a moda e maniera divertenta co ch’ins sa tegnair urden e schanegiar l'ambient. Per Radiotelevisiun Svizra Rumantscha ed er per La Quotidiana ha creà il graficher da Domat adina puspè motivs surprendents da reclama. Il 2002 ha survegnì Peter Haas per si‘ovra da vita il premi da renconuschientscha dal Chantun Grischun. Per ses 70avel anniversari il 2003 ha realisà la vischnanca burgaisa da Domat in'exposiziun speziala. E per sasez, per sia famiglia, ses amis ed enconuschents ha fatg Peter Haas per ses 80avel anniversari sco regal d'anniversari ina autobiografia dissegnada. Il dissegnader e cartoonist gieva malgrà sia malsogna Parkinson fin a sia mort ils 15 da schaner 2015 anc quasi mintga di a lavurar en ses atelier. Quatter mais suenter la mort preschenta Radiotelevisiun Svizra Rumantscha cun il film «Peter Haas, cartoonist e dissegnader, 1933-2015» in omagi a l’artist da Domat.