La famiglia Corona-Cardoso viva dapi bunamain 30 onns en l'Engiadin'Ota. Ana Cardoso è vegnida dal Portugal en Svizra per lavurar. En l'Engiadin'Ota ha ella emprendì d'enconuscher Paolo. Els èn maridads, han survegnì la figlia Chiara, Ana ha fundà ina firma da nettegiar ed uss han els il grond giavisch da survegnir il pass svizzer.
Nus avain accumpagnà els dal mument ch'els han cumenzà a rimnar ils documents fin tar il grond examen davant la cumissiun da natiralisaziun.
La seria
Mintga vischnanca en Svizra ha in'autra procedura da natiralisaziun. I dat pia in sulet passaport, ma passa 2'000 modas d'obtegnair quel. Per mussar tge differenzas che quai dat ha la SRG SSR producì ina seria naziunala. Ella ha accumpagnà protagonistas e protagonist en tut las quatter regiuns linguisticas da la Svizra. Era la famiglia Corona-Cardoso fa part da la seria.
Las differenzas
En il chantun Grischun basta quai d'ademplir ils criteris – per pudair lantschar la procedura da natiralisaziun. En auters lieus ston las candidatas ed ils candidats visitar in curs e dumagnar in examen per pudair trametter il dossier.
L'audizun davant la cumissiun communala è era fitg differenta. A Lugano ston ils candidats sa preschentar a 13 persunas, a Puntraschigna be a 3. Là han lieu en media quatter audiziuns da natiralisaziun ad onn, a Losanna èn passa 1'600 dossiers vegnids inoltrads aifer in onn.
Il grond di
L'audiziun avant las autoritads communalas è il punct culminant da la procedura. La gronda part da las candidatas e dals candidats è fitg gnervusa. Blers han emprendì mais a la lunga per quest examen. Fertant ch'intgins candidats han difficultads cun la lingua, han auters fadia da respunder las dumondas da l'audiziun. I dat autoritads che han preparà in catalog cun fin ad 80 dumondas, en auters lieus n’èsi betg dumandà uschè bler. Il squitsch è en mintga cas grond ed el sa manar ad in blackout.
