Manuela Steiner e sia sora han entamez il vitg d'Ardez la chasa paterna da lur mamma. En la gronda chasa engiadinaisa han ellas adina puspè passentà lur vacanzas. Creschidas si èn ellas a Lucerna ed en California. Il rumantsch steva fitg a cor a lur mamma. Dapertut ed adina ha ella discurrì rumantsch cun sias figlias ed uschia creà per ellas in'insla rumantscha. Era lur bab, in Svizzer tudestg, ha emprendì rumantsch. Durant las visitas ad Ardez era il rumantsch dapli ch'ina lingua da famiglia.
Tge capita cun la chasa?
La sora da Manuela Steiner è sa decidida d'emigrar en il Canada, e las duas soras ston decider tge che capita cun lur gronda chasa engiadinaisa. Manuela Steiner sto sa dumandar sch'ella è pronta da surpigliar la responsabladad per questa ierta.
En il film «Nossa chasa» confruntescha l'autura dal film, Manuela Steiner, sia famiglia cun la dumonda da l'ierta da la chasa e da l'ierta rumantscha. Ella sezza sto sclerir tge valur che la chasa ed il linguatg rumantsch han per ella.
RTR actualitad 11:00