Ina gronda sfida è da chattar scolastas e scolasts. Conradin Klaiss cumenza gia il december a tschertgar els. La davosa persuna d’instrucziun ha el chattà trais emnas avant il cumenzament dal curs.
Rumantschas e Rumantschs pudessan emprender il scazi da pleds e la structura grammaticala che blers rumantschs n’èn betg conscients e na san betg co i fiss propi correct. Ed era il plaschair vid la lingua.
Cun 154 participantas e participants ha il Cuors romontsch sursilvan intensiv da la Fundaziun Retoromana pudì sa legrar il 2024 dad in nov record. Il motiv dal nov record declera il directur dal curs, Conradin Klaiss, cun l’entira purschida. I na va be per emprender ina lingua. Participantas e participants èn durant las duas emnas sco ina famiglia. Igl è er ina colliaziun emoziunala.
Ina da las participantas ch’ha cumenzà directamain cun il livel dus è Petra Fässler. Ella vul gia dapi blers onns emprender rumantsch per savair tut las linguas svizras. Ella na vul numnadamain betg ch’il rumantsch mora ora.
Grev d’emprender è la successiun dals bustabs.
In’autra motivaziun ha Pascal Müller dad Uster e Trun/Campliun. El vul pudair tschantschar cun ses vischins a Trun rumantsch. Il mument discurran tuts tudestg cun el, e quai vuless el midar.
Per mai èsi impurtant ch’ils Rumantschs èn loschs da lur lingua e tschantschan rumantsch cun ils turists.
Durant duas emnas il fanadur han participantas e participants pudì emprender rumantsch en otg differents livels. Sper las lecziuns da lingua stevan era prelecziuns, concerts e referats sin il program. Il di d’excursiun, lavuratoris e chant communabel han cumplettà il program.
